Tanymal bloger Jan Ahmadiev Sherzattyń ápkesine qatysty kútpegen video jariialady, dep habarlaidy Dalanews.kz.
Onyń aitýynsha, Sherzattyń ápkesi Baqyt Reimova ózi jibergen videoda Baýyrjan Abdyrahmanov esimdi azamatty birneshe márte onyń otbasyna qarsy jalǵan aqparat taratyp, aqparattyq shabýyl jasaǵanyn aitqan. Tipti, ol Sherzattyń ólimine de sol kisini kinálap otyr.
Video barysynda Baqyt Reimova endi óz ólimine de Baýyrjan Abdyrahmanovty jaýapty dep sanaitynyn jetkizgen.
Osy beinejazbadan keiin Baqyt Reimova Almatydaǵy Raiymbek dańǵylynyń boiyndaǵy kópirge kóterilip, óz-ózine qol jumsaýǵa bel býǵan. Abyroi bolǵanda, ony kóshede júrgen politsei baiqap qalyp, der kezinde qutqaryp qalǵan.
«Sóz súiekten ótedi degen ras qoi. Bir adamnyń sózi qanshama qaiǵy men qasiretke sebep bola jazdady. Ózin “doktor” dep tanystyrǵan bul azamatqa birneshe ret eskertý jasadym. Biraq esh nátije bolmady. Eger Baqyt sýitsid jasasa, onyń otbasynyń qarǵysyna ushyraimyn dep oilamai ma? Bul adamnyń kózdegeni ne ekenin túsine alar emespin. Ózi de qara jamylyp otyrǵan otbasyna nege sonsha jabysyp aldy?» – dedi bloger Jan Ahmadiev.
Eske salaiyq, buǵan deiin Talǵardaǵy janjal kezinde qaza tapqan jasóspirim Sherzat Bolattyń ákesi Qarjaýbai Nurymovtyń qaryndasy Baqyt Reimovaǵa da «mitingke úndegeni úshin» degen aiyp taǵylyp, 15 táýlikke qamaýǵa alynǵan bolatyn. Sonymen qatar Reimovany sot Qazaqstannan deportatsiialaý jóninde sheshim shyǵarǵan. Biraq advokaty munymen kelispeitinin aitty.
Sherzat Bolattyń birneshe týysy qamaýǵa alynǵan bolatyn.
Eńbekshiqazaq aýdandyq soty ákimshilik is júrgizý tártibimen isterdi qaraý nátijeleri boiynsha azamat Saltanat Nurymova usaq buzaqylyq jasaǵany úshin (ÁQBtK 434-babynyń 1-bóligi) 20 AEK mólsherinde aiyppul salýmen ákimshilik jaýapkershilikke tartyldy.
QR beibit jinalystardy uiymdastyrý jáne ótkizý tártibi týraly zańnamasyn buzǵany úshin (ÁQBtK 488- babynyń 8-bólimi.) azamattyǵy joq Baqyt Reimova ákimshilik tártippen 15 táýlikke qamaýǵa alynyp, keiinnen QR sheginen shyǵaryp jiberildi.
Qoǵamdyq orynda balaǵat sózder aitqany, quqyq qorǵaý organdarynyń qyzmetkerlerin qorlap, sondai-aq qoǵamdyq tártip pen azamattardyń tynyshtyǵyn buzatyn ainalasyndaǵylarǵa qurmetsizdik tanytatyn is-áreketter jasaǵany jáne kólik quraldarynyń qozǵalysy úshin kedergiler jasaǵany úshin Qarjaýbai Nurymov 15 táýlikke ákimshilik qamaýǵa alyndy.
10 jeltoqsanda marqum Sherzat Bolattyń otbasy Nurqanat Ǵaiypbaevty jer qoinyna tapsyrdy. Jerleý rásiminen keiin Qarjaýbai Nurymov qolyna pyshaq ustap, BAQ ókilderimen kezdesýdi talap etti. Atalǵan oqiǵadan keiin Nurymovty politsiia qyzmetkerleri ustap áketti.
Resmi derekke súiensek, saǵat 15:30 shamasynda Azat aýylynda jerleý rásimi kezinde qoǵamdyq tártip buzylǵan. Aitýlarynsha, Qarjaýbai Nurymov qolyna pyshaq ustap, óz-ózine qol jumsamaq bolǵan.
"Qarjaýbai Nurymov prokýrordyń zańdy saqtaý týraly túsindirmelerin elemedi. Shekten tys agressivti minez-qulyq tanytyp, basqalardy óz-ózine qol jumsaimyn dep qorqytty. Sonymen qatar politsiia qyzmetkerine pyshaqpen shabýyl jasady. Onyń minez-qulqy ózine de, basqalarǵa da qaýip tóndirdi", - delingen habarlamada.
