Politsiia 16 jastaǵy Sherzat Bolattyń ólimine qatysty is boiynsha taǵy úsh adamdy ustady. Bul týraly Almaty oblysynyń prokýrory Berik Adamov málimdedi, - dep habarlaidy Dalanews.kz.
Buryn jeti adam ustalǵany habarlanǵan edi. Endi ustalǵandardyń sany 10-ǵa jetti.
"Bul is boiynsha 10 adam kúdikti dep tanyldy. Taǵy ekeýi qylmystyq qýdalaý orbitasynda, biraq olar - qorǵaný quqyǵy bar kýáger", - dedi Berik Adamov brifingte.
Kisi óltirý jáne buzaqylyq deregi boiynsha qylmystyq is qozǵaldy.
Eske salaiyq, buǵan deiin Talǵarda 16 jastaǵy Sherzatty óltirdi dep aiyptalyp jatqan kúdiktilerdiń sýreti áleýmettik jelide jappai taralyp ketken edi.
QirSabyn telegram arnasy birneshe kúdiktiniń sýreti men olardyń esimin jariialady. Derekkózdiń málimetinshe, kúdikteler 1993, 1998 jáne 2000 jylǵy azamattar. Olardyń ekeýi buǵan deiin de uryp-soǵý faktileri boiynsha jaýapqa tartylǵany belgili boldy.
Sot derekterine súiensek, azamat A. jáne onyń dosy buǵan deiin de buzaqylyq áreketteri úshin jaýapqa tartylǵan. Ótken jyldyń kúzinde azamat N. ekeýi janarmai beketinde beitanys jigitke shabýyl jasap, ortasha dárejedegi jaraqat salǵan. Alaida sotta eki tarap tatýlasyp, isti jyly japqan.
Azamat N. bolsa, qazirgi ýaqytta tóbeles úshin shartty túrde bas bostandyǵynan aiyrylǵan. Onyń buǵan deiin adamdarǵa tórt márte shabýyl jasaǵany belgili boldy. Biraq jábirlenýshiler oǵan belgisiz sebeptermen keshirim berip, tatýlasýǵa kelisken.
Osy tusta álemjelide Sherzat pen onyń otbasyna shabýyl jasaǵan jigitterdiń “Hýtor” atty jergilikti qylmystyq toppen bailanysy bar degen aqparat jeldei esýde. Toptyń basshysy Hasan esimdi azamat kórinedi. Kóptiń aitýy boiynsha, ol Talǵar aýdanyn úreide ustap otyr.
Aita keteiik, 12 qazanǵa qaraǵan túni Talǵar tragediiasynda qaza tapqan Sherzat Bolattyń úii órtenip ketti.
Qazirgi tańda Talǵar aýdanynda úidi órteý qylmysy boiynsha barlyq aiǵaq alynyp, qajetti saraptamalar júrgizilýde.
Ishki ister ministriniń birinshi orynbasary Baýyrjan Álenov pen Almaty oblysynyń prokýrory Berik Adamov Talǵar aýdanyndaǵy úidi órteý faktisi boiynsha tergeý barysy týraly habarlady.
Álenovtyń aitýynsha, qylmys jasalǵan sátten bastap, iaǵni 4 qazannan beri Talǵar aýdanynda ministrdiń birinshi orynbasary bastaǵan IIM ortalyq apparaty qyzmetkerlerinen quralǵan jedel-tergeý toby jumys istep jatyr.
"Jedel-tergeý toby qurylyp, qylmys jasalǵan jerde muqiiat tekserý jumystaryn júrgizýde. Beinebaqylaý kameralarynan jazbalar qaralýda. Aýlalar men esepte turǵan tulǵalar tekserilýde. Otbasynyń turǵylyqty jerin politsiia qyzmetkerleri patrýldeýde", - dedi ol.
Oqiǵa oryn alǵan kezde órt bolǵan úide eshkim turyp jatqan joq edi. Januia qazirgi kezde basqa mekenjaida turyp jatyr.
Qylmyskerler ustalyp, mindetti túrde jaýapqa tartylady. Sonymen qatar jalǵan aqparat taratpaýǵa shaqyramyn, – dedi Ishki ister ministriniń birinshi orynbasary Baýyrjan Álenov.
Almaty oblysynyń prokýrory Berik Adamov barlyq tergeý áreketteri Bas prokýratýranyń baqylaýynda ekenin atap ótti.
"Tergeý barysy týraly bas prokýrorǵa esep beremin. Búgingi tańda arnaiy prokýrorlar úidi órteý faktisin tergep jatyr. Oqiǵa ornynan barlyq aiǵaqtar alynyp, olar boiynsha tiisti saraptamalar taǵaiyndaldy. Biz saraptama nátijelerin kútýdemiz, odan keiin qosymsha aqparat beriledi. Búgingi tańda osy is boiynsha kóptegen jalǵan aqparat taratylýda. Azamattarǵa jalǵan aqparat taratqany úshin qylmystyq jaýapkershilik qarastyrylatynyn eskertkim keledi", – dedi Almaty oblysynyń prokýrory Berik Adamov.
