Advokat Meıirman Shekeev Sherzat isi boıynsha sottalýshylardyń biri bostandyqqa shyqqanyn málimdedi, dep habarlaıdy Dalanews.kz.
"Dýman Ysqaq birinshi satydaǵy úkimdegi jazany ótep qoıǵandyqtan Almaty oblystyq sotynyń qylmystyq ister jónindegi sot alqasynyń sýdıasy Musabekovanyń 2025 jylǵy 23 shildedegi sot qaýlysymen bultartpaý sharasy joıylyp, qamaýdan bosatyldy", – deıdi advokat Meıirman Shekeev.
Sonymen qatar, advokat apelásıalyq sot qashan ótetinin aıtty.
Meıirman Shekeevtiń sózinshe, Sherzat isi boıynsha apelásıalyq sot 18 tamyzda saǵat 11:00-de Almaty oblysy sotynyń ǵımaratynda ótedi.
Eske salaıyq, buǵan deıin Sherzat Bolatty óltirdi degen kúdiktilerdiń jeteýi apelásıalyq shaǵym túsirgen bolatyn.
Advokattyń aıtýynsha, 21 maýsym kúni sot úkimi zańdy kúshine engen. Sol kúnnen bastap, sondaı-aq sottalýshylar úkimdi qoldaryna alǵan kúnnen keıingi 15 táýlik ishinde shaǵym túsirýge quqyqtary bar.
«Qazirdiń ózinde sottalýshylar men olardyń qorǵaýshylarynyń basym bóliginen apelásıalyq shaǵym kelip tústi. Tek Shyńǵys Belǵojaev pen kámeletke tolmaǵan Dýman Ysqaqtan basqa barlyq sottalýshy shaǵym túsirgen. Apelásıalyq sot otyrysynyń naqty kúni keıinirek habarlanady», – dedi qorǵaýshy.
Bıyl 5 maýsymda Talǵar aýdandyq sotynda kisi qolynan qaza tapqan jasóspirim Sherzat Polattyń ólimine qatysty úkim shyqqan bolatyn. Sot prosesin sýdıa Erjan Januzaqov júrgizdi.
Sot úkimimen:
- Abzal Shynasyl – 23 jylǵa,
- Ravıl Sakıev – 20 jylǵa,
- Azamat Toqtaýbaev – 15 jylǵa,
- Nurqıas İlıasov – 9 jylǵa (buǵan deıingi 2,5 jyl shekteý jazasyn eskere otyryp),
- Shyńǵys Belǵojaev, Darhan Áskentaı, Nurbol Toqtaýbaev, Dıdar Qalıahmet – árqaısysy 7 jylǵa sottaldy,
Al Dýman Ysqaq QR Qylmystyq kodeksiniń 434-baby (aýyr qylmys jasalǵanyn habarlamaý) boıynsha 1,5 jylǵa bas bostandyǵynan aıyryldy. Onyń ızolátordaǵy bir kúni eki kún retinde esepteletin boldy.
