Sherzat Bolat isindegi sýdıa blogerler men halyqqa eskertý jasady,- dep habarlaıdy Dalanews.kz.
Sýdıa Erjan Januzaqovtyń aıtýynsha, prosesti talqylaýǵa, tergeý men sottyń jumysyna baǵa berýge bolmaıdy.
"Áleýmettik jelilerde blogerler men sot prosesine eshqandaı qatysy joq basqa azamattar jeke pikir bildirip, tergeý áreketteri men sot prosesiniń barysyna sýbektıvti baǵa berip jatyr. Qazaqstan Respýblıkasy Konstıtýsıasynyń 75-babynyń 1-tarmaǵyna sáıkes Qazaqstan Respýblıkasynda sot tóreligin tek sot júzege asyratynyn eske salamyz. Sottyń sot tóreligin iske asyrý jónindegi qyzmetine aralasýǵa jol berilmeıdi jáne zań boıynsha jaýapkershilikke ákep soǵady", - dedi sýdıa.
Ol sot prosesi aıaqtalǵanǵa deıin, úkim shyǵarylǵanǵa jáne zańdy kúshine engenge deıin sot prosesine pikir bildirý, quqyqtyq baǵa berý zańsyz ekenin málimdedi.
Sherzat Bolattyń ólimi týraly ne belgili?
Eske salaıyq, byltyr Talǵarda jappaı tóbeles bolyp, saldarynan 16 jastaǵy jasóspirim Sherzat Bolat kóz jumdy.
Kámeletke tolmaǵan balany óltirý deregi boıynsha Almaty oblysynyń Polısıa departamenti qylmystyq is qozǵady. Sondaı-aq, olardyń úıi órtenip ketti.
Kóp uzamaı, ıaǵnı 9 jeltoqsanda marqum Sherzat Bolattyń aǵasy Nurǵanat Ǵaıypbaev ajal qushty. Polısıa departamenti aldyn ala derekter boıynsha ol sýısıd jasaǵanyn málimdedi. Oǵan dálel retinde polıseıler Nurǵanattyń týysyna messendjer arqyly jazǵan hatyn jarıa etti.
Al marqum Sherzattyń ákesi baýyry Nurǵanat Ǵaıypbaevty jer qoınyna tapsyrǵanan keıin buqaralyq aqparat quraldarymen kezdesýdi talap etip, kóshege shyqty. Alaıda araǵa uzaq ýaqyt salmaı Qarjaýbaı Nurymovty polısıa qyzmetkerleri ustap áketti. Artynsha Sherzat Bolattyń ápkesi qamaýǵa alyndy. Keıin Qarjaýbaı Nurymov 15 táýlikke ákimshilik qamaýǵa alyndy.
