9 jeltoqsan kúni Talǵarda jappai tóbeles kezinde qaza tapqan jasóspirim Sherzat Bolattyń otbasynda taǵy bir tragediia boldy. Sherzattyń týys aǵasy Nurqanat Ǵaiypbaev óli tabyldy. Nurqanat týraly ne belgili? Dalanews.kz tilshisi sholý jasady.
Nurqanat Ǵaiypbaev - Sherzattyń ákesi Qarjaýbai Nurymovtyń inisi. 30 jastaǵy Nurqanat 9 jeltoqsanǵa qaraǵan túni Talǵar mańynda óli tabylǵan.
Boljam boiynsha sýitsid jasalǵan
Politsiianyń boljamy boiynsha, ol sýitsid jasaǵan. Denesinde zorlyq belgileri bolmaǵan. Nurqanattyń denesi beiittiń janynan tabylǵan.
Nurqanat aldyn ala messendjer arqyly hat jazǵan. Hatynda ol týysqandarymen qoshtasyp, jieniniń janyna jerleýdi suraǵan.
Kúdiktiler qandy oqiǵa bolǵan túni Nurqanatty óltirmek bolǵan
Biyl 15 qarasha kúni jábirlenýshi taraptyń qorǵaýshysy Maral Jailaýbaeva qandy oqiǵa bolǵan túni kúdiktiler marqum Sherzattyń aǵasy Nurqanatty da óltirýge oqtalǵanyn habarlaǵan bolatyn.
"Biz Nurqanatty óltirýge oqtalý faktisi boiynsha tergeý organdaryna ótinish jiberdik. Kúdiktiler Nurqanatqa dene jaraqattaryn keltirip, 3-4 márte jambasy men tósine pyshaq suqqan. Atalǵan áreketter adamdy ómirinen aiyrýǵa tikelei baǵyttalǵan, iaǵni naqty nietpen jasalǵan dep esepteimiz. Bul ótinish qazir tergeý organdarymen qaralýda. Qylmystyq is boiynsha jábirlenýshiler men kúdiktilerdiń ortasynda bettestirý ótkizilip, qazirgi tańda taǵaiyndalǵan saraptamalardyń qorytyndylarymen biz tanysýdamyz", - dedi advokat.
Jelidegi aqparat boiynsha, Nurqanat Sherzattyń ólimine qatysty isti tergeýde mańyzdy ról atqarǵan. Ol jábirlenýshi bolǵan jáne sotta mańyzdy kýálik berýge daiyndalyp júrgen eken. Onyń kenet qaza bolýy otbasy men advokattar tarapynan kóptegen suraqtardy týyndatýda.
Nurqanattyń týystary sýitsid degen boljamǵa senbeidi
Ǵaiypbaevtyń denesinde zorlyq belgileri anyqtalmaǵanymen marqumnyń otbasy ol sýitsid jasady degenge senbeidi. Bul týraly Nurbolat Ǵaiypbaevtyń ápkesi tilshilerge aitqan.
Qazirgi tańda marqumnyń otbasy bul jaitqa qatysty qosymsha pikir berýden bas tartyp, qandai da bir túsirilim jasaýǵa tyiym salǵan. Olardyń sózinshe, Nurqanattyń denesi máiithanada, al politsiia tergeý júrgizip jatyr.
Sherzat Bolattyń otbasyn politsiia kúzetetin. Al Nurqanat Ǵaiypbaevtyń ózi túngi ýaqytta shyǵyp ketken eken.
Marqum Sherzat Bolattyń otbasy da Talǵar mańynan óli tabylǵan týysy Nurqanat Ǵaiypbaevtyń "ózine ózi qol salǵanyna" senbeidi. Bul týraly Sherzattyń ákesi Qarjaýbai Nurymov aityp bergen.
Qarjaýbai Nurymovtyń sózinshe,Nurqanat hat jazǵannan keiin olar bes adam bolyp Ǵaiypbaevty izdeýge shyqqan. Aldymen Talǵardaǵy zirat aýmaǵy aldynan marqum minip ketken kólikti tapqan. "Esigi ashyq boldy, ishinde uialy telefony jatty" dedi Qarjaýbai Nurymov. Onyń sózine qaraǵanda, zirat aldynda jar bar, inisi sol jerden tómen túskenin jerdegi izden anyqtaǵan.
– Biz túnde kelgende qar jaýyp turǵan, jardan túsip, 500-700 metr jerde jol boiyndaǵy qýysqa baryp, taldyń jiegine otyryp, ólip qalǵan. Moinynda sym turǵan. Quzyrly organdarǵa keshe bárin túsindirdim. Eki saǵattan artyq jan-jaqty izdedik. Myna jardyń biiktigi – 7-8 metr, osydan syrǵyp túsken. Baýyrymnyń ólemin degen nieti bolǵan emes. Qandai shyndyqty aityp jatsaq da, bizdi qaralap jatqan adamdar bar. Sol úshin artyq eshteńe aitqym kelmeidi, – dedi Qarjaýbai Nurymov Azattyq tilshisine bergen suhbatynda.
Sherzatqa qatysty oqiǵadan soń qara jamylǵan otbasynyń úii órtenip, politsiia aýdanda kúzetti kúsheitken. Nurymov "ádil sot bolady dep kútip júrdik" dedi.
– Saraptama "ózine qol jumsady" deidi. Ony qosymsha taldaýǵa zertteýge jiberemin. Qandai jaǵdai bolsa da biz eshkimdi óltirgen joqpyz, – dedi Nurymov.
Talǵardaǵy ziratta Sherzat Polattyń beiitiniń qasynan taǵy bir qabir qazyldy.
