Ekinshi dúniejúzilik soǵystyń áli kúnge deiin tolyq zerttelmegen, ashylmaǵan syrlary az emes. Sondai kópke málim bola qoimaǵan tarihtyń bir parasy – Frantsiia jerinde jaýǵa qarsy qasqaiyp turyp, erlikpen shaiqasqan qazaqstandyq partizandardyń taǵdyry. Búgin osy erekshe tarih betteri Qazaqstan men Frantsiianyń tarihshylary men diplomattary tarapynan qyzý zerttelip jatyr.
Professor Gúlnár Meńdiqulovanyń deregine súiensek, Frantsiia aýmaǵynda fashizmge qarsy kúresken qazaqtardyń sany myńnan kem emes. Alaida olardyń naqty esebin shyǵarý – áli de tarihshylardyń moinyndaǵy mindet.
Osy oraida elordada Frantsiianyń ataqty qolbasshysy ári memlekettik qairatkeri Sharl de Goll eskertkishiniń aldynda alǵash ret gúl qoiý jáne marqumdarǵa medaldar tabystaý rásimi ótti. Frantsiianyń Qazaqstandaǵy Tótenshe jáne ókiletti elshisi Silvan Giiogeniń qolynan Kabysh Omarovtyń, Kádem Jumaniiazovtyń jáne Áshimbek Istybaevtyń urpaqtary ardagerlerge berilgen arnaiy marapattardy qabyl aldy.
Kabysh Omarovtyń uly, maidanger urpaǵy Qabiden Omarov Toppress.kz saityna bergen suhbatynda, kezinde ákesi Frantsiiadaǵy áskeri paradta Piatyi respýblikasynyń tuńǵysh prezidenti Sharl de Golldiń jeke qolynan «Jaýyngerlik krest» ordenin alǵanyn zor tolqynyspen eske aldy.
Saltanatty shara barysynda Silvan Giioge myrza bul Qazaqstan jerinde Ońtústik Frantsiiada natsizmge qarsy kúresken qazaq jaýyngerleriniń erligine resmi túrde alǵash ret qurmet kórsetilip otyrǵanyn atap ótti:
«Búgin biz eki eldiń tarihynda ortaq tamyr, taǵdyrlas oqiǵalar bar ekenin tereńirek túsine bastadyq. Frantsiiany natsisterden azat etýge qatysqan qazaqstandyqtarǵa jáne tutas qazaq halqyna aitar alǵysymyz sheksiz».
Sondai-aq sharaǵa Qazaqstan Respýblikasynyń Syrtqy ister ministriniń orynbasary Roman Vasilenko, Qorǵanys ministriniń birinshi orynbasary – Bas shtab bastyǵy, general-leitenant Sultan Kamaletdinov, diplomatiialyq korpýs ókilderi, tarihshylar men Soprotivlenie qozǵalysyna qatysýshylardyń urpaqtary qatysty.
