Zaisan aýdanynda salynyp jatqan jańa áýejai biyl maýsym aiynda alǵashqy áýe kemesin qabyldaidy, dep habarlaidy Dalanews.kz.
Bas merdiger «ELHON» JShS bas direktorynyń orynbasary Áset Sultanovtyń aitýynsha, qurylys barysynda aitarlyqtai qiyndyqtar týyndamaǵan. Áýejaidy jobalaý jáne salý jumystaryn «Qazaeronavigatsiia» RMK júzege asyrýda. Uzyndyǵy 2200 metr bolatyn ushý-qoný jolaǵy men jalpy aýmaǵy 4000 sharshy metrdi quraityn terminal merziminde salynyp jatyr. Sondai-aq rýlej joldary, tórt áýe kemesine arnalǵan perron, basqarý-dispetcherlik pýnkt, avariialyq-qutqarý qyzmeti, meteostantsiia jáne radionavigatsiialyq jabdyqtar qarastyrylǵan.
«Jalaqy boiynsha bereshek joq. 200-ge tarta jumysshy turaqty eńbek etýde. Keibir baǵyttar boiynsha alda kelemiz. Qazirgi ýaqytta nysannyń 65 paiyzy aiaqtaldy», – dedi Áset Sultanov.
Joba Zaisan aýdany úshin áleýmettik-ekonomikalyq turǵydan mańyzdy. Áýejai iske qosylǵan soń óńirge týrister tartýǵa keń múmkindik ashylady. Alǵashqy kezeńde Qytaidyń Úrimshi qalasyna, Altai aimaǵyna jáne Qanas kóline halyqaralyq reister ashý josparlanǵan.
Sonymen qatar Astana, Almaty jáne Óskemen qalalaryna ishki baǵyttar boiynsha turaqty áýe qatynasy iske qosylady. Áýejai Bombardier Q400, ATR-72 jáne osyǵan uqsas óńirlik sanattaǵy áýe kemelerin qabyldai alady.
Bul joba – óńirdiń kýrorttyq aimaqtarynda úsh jańa áýejai salýdy kózdeitin aýqymdy bastamanyń bir bóligi. Onyń aiasynda Katonqaraǵai men Mańǵystaý oblysyndaǵy Kendirlide de nysandar boi kóterýde.
Qurylystyń barysymen oblys ákimi Nurymbet Saqtaǵanov pen Májilis depýtaty Erlan Sairov tanysty. Aimaq basshysy nysandy merziminde ári sapaly aiaqtaýdy tapsyrdy.
«Ushý-qoný jolaǵy tolyq aiaqtaldy. Jumysshylar jetkilikti, jalaqy ýaqytynda tólenýde. Buiyrsa maýsym aiynda orta qashyqtyqqa ushatyn áýe kemelerin qabyldaimyz. Terminal bir mezette 150 jolaýshyǵa qyzmet kórsete alady. Kórshi eldermen áýe reisteri ashylyp, óńirge sheteldik týristerdi tartýǵa jol ashylady», – dedi oblys ákimi.
Halyqaralyq baǵyttary bar áýejai iske qosylǵanda, shekaradaǵy Zaisan aýdanynyń kelbeti qysqa merzimde ózgerip, óńirdiń týristik áleýeti aitarlyqtai arta túspek.
