Májilis depýtaty Nikita Shatalov ózine qatysty tarap jatqan aiyptaýlar men qaýesetterge jaýap berdi, dep habarlaidy Dalanews.kz.
"Men qazaqpyn, bul – meniń basty bolmysym. Sońǵy ýaqytta meni "vatnik", "sheteldiń agenti", "prokremldik" dep aiyptaǵandar boldy. Biraq bul aiyptaýlardyń eshqaisy shyndyqqa janaspaidy", – dedi Shatalov.
Depýtattyń aitýynsha, onyń sózderi keibir reseilik BAQ-ta burmalanyp, konteksten úzilgen. Ol bul jaǵdaidyń manipýliatsiia ekenin jáne oǵan qarsy turatynyn jetkizdi.
"Men táýelsiz Qazaqstanda dúniege keldim. Ol kezde, Qudaiǵa shúkir, Keńes Odaǵy joq edi. Osy jerde ósip-óndim, otbasyn qurdym, balaly-shaǵaly boldym. Meniń jalǵyz Otanym – Qazaqstan. Basqa otanym joq jáne bolmaidy da!", – dedi ol.
Shatalov qazirgi jaǵdaidy aqparattyq shabýyl dep sanaitynyn aityp, bul máseleni jai qaldyrmaitynyn málimdedi. Sonymen qatar ol aldaǵy ýaqytta mundai túsinbeýshilikterge jol bermeýge tyrysatynyn atap ótti.
Eske salaiyq, buǵan deiin Májilis depýtaty Nikita Shatalov kýlýarda áleýmettik jelide ózine qarsy kóp jazylǵan syni pikirlerge jaýap bergen edi. Nikita Shatalov “paragraf” saitynda óziniń ómirbaiany qate jazylyp ketkenine (QazSSR-da týǵan dep jazylǵan) óziniń qatysy joǵyn aitqan bolatyn. Ony tehnikalyq qatelik dep atady. Aqparat kózine habarlasyp, qatelikti túzetýdi ótingenin de jetkizdi.
"Sol qatelikti birtúrli ainaldyryp, men kózimmen kórmegen sovet odaǵymen aralastyryp jiberipti. Men oǵan kóp nazar aýdarmaimyn. Adamdar aqparatpen manipýliatsiia jasap, men jazbaǵan, aitpaǵan aqparattardy taratty. Men jariia tulǵa ekenimdi eskere kele buǵan sabyrly túrde qaraimyn", – deidi ol.
Depýtat ózin reseishil dep aiyptaǵandardyń aitqany “qyp-qyzyl ótirik” dep jaýap berdi. Geosaiasat jaily sóz qozǵaǵanda árdaiym Qazaqstannyń ulttyq múddesi turǵysynan jazatynyn jetkizdi.
Men osy eldiń patriotymyn. Basqa adamdarǵa birdeńe dáleldeýge zaýqym joq. Meni jiti oqyǵan adamdar, sózimdi oqyp, kórip otyrǵandar qandai múddelerdi qorǵaitynymdy biledi. Ustanymymnyń Reseige esh qatysy joq. Ókinishke qarai, mundai qubylys men etnikalyq orys bolǵannan keiin týyndap jatyr dep aitýǵa májbúrmin. Sebep sol, – deidi ol.
Buǵan deiin Nikita Shatalov áleýmettik jelidegi paraqshasynda geosaiasi taqyrypta jazba qaldyryp, sol úshin synǵa qalǵan edi. Ony reseishil dep aiyptaǵandar boldy. Ol sózinde Ýkrainany qoldap otyrǵan Batys elderin “idealist” dep atap, Ýkraina prezidentiniń komandasyn synaǵan. Onyń aldynda Kaspii qubyry kontsortsiýmynyń Reseidegi stantsiiasyna dronmen shabýyl jasalǵanda Shatalov Qazaqstan Ýkrainany jaýapkershilikke shaqyrý kerek dep málim etken.
