Bıyl aýa-raıynyń qolaısyzdyǵynan jaýyn-shashynnyń az túsýi jáne qýanshylyqtyń saldarynan zardap shekken batys óńirine shardarlyqtar 300 tonnaǵa jýyq mal azyǵy jóneltip, járdem kórsetti, – dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.

Shardara aýdanynda 5 500 den astam sharýa jáne fermerlik qojalyqtar, óndiristik kooperatıvter, jaýapkershiligi shekteýli seriktestikter aýyl sharýashylyǵy óndirisimen aınalysady.

Bıyl aýdanda 59 300 gektar jerge aýyl sharýashylyǵy daqyldary egilgen. Onyń ishinde 21 959 gektar jerge eski jáne jańa jońyshqa egilip, dala shóbi jáne sabandy qosqanda 207 myń tonnaǵa jýyq mal azyǵy daıyndalǵan.

Aýdanda 56 892 bas iri qara mal, 14 671 bas jylqy, 3 160 bas túıe, 256 100 ýaq mal bar. Atalǵan mal basyna qajetti mal azyǵy (jońyshqa, tabıǵı shóp, saban) - 176 900 tonnany quraıdy. Al, aǵymdaǵy jyly 59 300 ga sýarmaly egistik alqabyna aýyl sharýashylyǵy daqyldary egilse, onyń 50 paıyzdan astamy mal azyǵyna baǵyttalǵan. Sondaı-aq, 21 959 gektar jońyshqadan 241 550 tonna ónim alý josparlanýda.