Shardaralyq sharýalar alǵashqy baqsha ónimin jınaýdy bastady. Ótken aptada Jaýshyqum aýyldyq okrýginde darbyz ekken dıqandar alǵashqy 30 tonna ónimdi Reseıdiń Iakýtıa avtonomıalyq respýblıkasyna satylymǵa jóneltti. Bul týraly aýdan ákiminiń baspasóz qyzmeti habarlaıdy.

2 gektar alqapqa jamylǵy astyna erte pisetin darbyz tuqymyn otyrǵyzǵan «Baǵdat» sharýa qojalyǵynyń dıqandary plenkany qos qaptama túrinde jaýyp shyqqan eken. Birinshi bolyp egistik alqaptan ónim artqan qojalyq tóraǵasy B.Shynazbaev ár gektarynan kem degende 40 tonnadan darbyz alýdan úmitti.

Aýdan boıynsha jaýshyqumdyq sharýalar jamylǵy astyna ónim egýden aldyńǵy orynda tur. Aýyl ákimi Serik Mahambetovtiń málimetinshe, qazirgi tańda 3312 gektar aýmaqqa baqsha daqyldary egilgen. Munyń 100 paıyzy jamylǵy astynda ósirilip otyr.

Kóktem bastalysymen qarbalas tirlikke kóshetin dıqandar qaýymy plenka astyna daqyl egýdiń shyǵyny ár gektaryna 500 myń teńgeni shamalaıtynyn aıtady. Degenmen, satýǵa erte shyǵaryp úlgerse, shyqqan shyǵynnyń orny tolady. Erte pisken darbyzdyń kılosy 100 teńgege jýyq baǵadan satyldy.

Eń bastysy, shardaralyq sharýalar bıylǵy jyly shegirtke shabýylynan aman. Kúndelikti qadaǵalaýdyń arqasynda zıankestermen kúres óz deńgeıinde júrgizilip, dıqandardyń alańsyz tirlik jasaýlaryna múmkindik týdy.