Túrkistan oblysy Shardara aýdanynda ákesin qan-josa etip sabaǵan er adamǵa qatysty tyń derek shyqty, dep habarlaidy Dalanews.kz.
Buǵan deiin áleýmettik jelide er adam jergilikti meshit azanshysy bolyp qyzmet etetini habarlanǵan bolatyn.
Alaida Túrkistan oblysynyń bas imamy Erjan Tólepovtiń sózinshe, er adam Qazaqstan musylmandary dini basqarmasynyń din qyzmetkeri emes;
"Ol meshitte eshqashan azan aitpaǵan jáne resmi dini qyzmet atqarmaǵan. Onyń qyzmeti din salasyna qatysy joq, qosymsha toi júrgizýshi (tamada)", - deidi Tólepov.
Qazaqstan musylmandary dini basqarmasy mundai áreketterdi qatań aiyptaidy. Sonymen birge, ata-anaǵa qurmet – árbir musylmannyń basty mindeti ekenin qalyń jurtshylyqtyń esine salady.
Eske salaiyq, áleýmettik jelide Túrkistan oblysy, Shardara aýdanynda qartaiǵan múgedek ákesin balasy aiaýsyz soqqyǵa jyqqany túsirilgen video taraǵan bolatyn.
Kadrdan balasy men kelininiń sóilei almaityn, ózdiginen júrip-tura almaityn qariiany kóshede jáne úi aýlasynda súirep júrgenin kórýge bolady. Uly ákesin balaǵattap, júre almaǵany úshin birneshe ret uryp-soqqan. Soqqydan qariianyń aýzynan qan ketkeni baiqalady. Biraq qariia esh qarsylyq bildirmeidi, al kelini arasha túspeidi.
Jelide bul jaǵdai qyzý talqylanyp, úlken rezonans týdyrǵannan keiin oblystyq politsiia departamenti oqiǵaǵa qatysty resmi málimdeme jasady.
"Oqiǵa boiynsha qylmystyq is qozǵaldy. Kúdikti ustalyp, ýaqytsha ustaý izoliatoryna qamaldy. Qazir oqiǵanyń mán-jaiy anyqtalýda, tergeý amaldary júrgizilýde", – delingen politsiianyń habarlamasynda.
