تۇركىستان وبلىسى شاردارا اۋدانىندا اكەسىن قان-جوسا ەتىپ ساباعان ەر ادامعا قاتىستى تىڭ دەرەك شىقتى، دەپ حابارلايدى Dalanews.kz.

بۇعان دەيىن الەۋمەتتىك جەلىدە ەر ادام جەرگىلىكتى مەشىت ازانشىسى بولىپ قىزمەت ەتەتىنى حابارلانعان بولاتىن. 

الايدا تۇركىستان وبلىسىنىڭ باس يمامى ەرجان تولەپوۆتىڭ سوزىنشە، ەر ادام قازاقستان مۇسىلماندارى ءدىني باسقارماسىنىڭ ءدىن قىزمەتكەرى ەمەس؛

"ول مەشىتتە ەشقاشان ازان ايتپاعان جانە رەسمي ءدىني قىزمەت اتقارماعان. ونىڭ قىزمەتى ءدىن سالاسىنا قاتىسى جوق، قوسىمشا توي جۇرگىزۋشى (تامادا)"، - دەيدى تولەپوۆ. 

قازاقستان مۇسىلماندارى ءدىني باسقارماسى مۇنداي ارەكەتتەردى قاتاڭ ايىپتايدى. سونىمەن بىرگە، اتا-اناعا قۇرمەت – ءاربىر مۇسىلماننىڭ باستى مىندەتى ەكەنىن قالىڭ جۇرتشىلىقتىڭ ەسىنە سالادى.

ەسكە سالايىق، الەۋمەتتىك جەلىدە تۇركىستان وبلىسى، شاردارا اۋدانىندا قارتايعان مۇگەدەك اكەسىن بالاسى اياۋسىز سوققىعا جىققانى تۇسىرىلگەن ۆيدەو تاراعان بولاتىن. 

كادردان بالاسى مەن كەلىنىنىڭ سويلەي المايتىن، وزدىگىنەن ءجۇرىپ-تۇرا المايتىن قاريانى كوشەدە جانە ءۇي اۋلاسىندا سۇيرەپ جۇرگەنىن كورۋگە بولادى. ۇلى اكەسىن بالاعاتتاپ، جۇرە الماعانى ءۇشىن بىرنەشە رەت ۇرىپ-سوققان. سوققىدان قاريانىڭ اۋزىنان قان كەتكەنى بايقالادى. ءبىراق قاريا ەش قارسىلىق بىلدىرمەيدى، ال كەلىنى اراشا تۇسپەيدى.

جەلىدە بۇل جاعداي قىزۋ تالقىلانىپ، ۇلكەن رەزونانس تۋدىرعاننان كەيىن وبلىستىق پوليسيا دەپارتامەنتى وقيعاعا قاتىستى رەسمي مالىمدەمە جاسادى.

"وقيعا بويىنشا قىلمىستىق ءىس قوزعالدى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى. ءقازىر وقيعانىڭ ءمان-جايى انىقتالۋدا، تەرگەۋ امالدارى جۇرگىزىلۋدە"، – دەلىنگەن پوليسيانىڭ حابارلاماسىندا.