Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen ótken Salyq kodeksin engizý jónindegi jobalyq keńseniń 9-otyrysynda EAEO aıasynda jańa salyq normalaryn qoldanýǵa jáne zańnamaǵa engiziletin aldaǵy ózgeristerge qatysty kezekti máseleler toptamasy qaraldy, dep habarlaıdy Dalanews.kz.

Mańyzdy máselelerdiń biri – EAEO alańynda alkogól ónimderiniń qaýipsizdigi týraly EAEO-nyń jańa tehnıkalyq reglament jobasyn talqylaýǵa qatysty, bul qujatqa sáıkes júzimnen emes, mysaly alma nemese almurttan óndiriletin jemis sharaptary sharap sanatyna jatqyzylmaıdy. Reglament qabyldanǵan jaǵdaıda jemis sharaptary joǵary aksız salynatyn ónim sanatyna aýysady.

Tehnıkalyq reglamenttiń sharttaryn EAEO-ǵa qatysýshy elderdiń salalyq sarapshylary birneshe jyldan beri talqylap keledi.  Jobalyq keńseniń otyrysynda qatysýshylar jańa tehnıkalyq reglament qabyldanǵan jaǵdaıda otandyq óndirýshilerdi qoldaý múmkindigin qarastyrdy. Aksızdi sharap deńgeıinde tek júzim ónimi úshin ǵana emes, sonymen qatar alkogóldi qospaı tabıǵı ashytý arqyly elde óndiriletin basqa da jemisterden alynǵan sharaptar úshin de ornatý týraly aldyn ala sheshim qabyldandy.

Bul rette yqtımal sur shemalardy boldyrmaý úshin baqylaýshy organdar tarapynan jemis sharaptaryn óndirýdi baqylaý kúsheıtiledi. Bul sheshimdi iske asyrý úshin Salyq kodeksine ózgertýler engizý qajet, biraq olar tek Qazaqstan tehnıkalyq reglamentti bekitkennen keıin qoldanysqa enedi. Sondyqtan bul másele júıelik tizimge engizilgen jáne bolashaq túzetýler paketinde eskeriledi.