Naýryznama onkúndigi aiasynda TAS GROUP kompaniiasynda ulttyq qundylyqtardy dáripteýge baǵyttalǵan taǵylymdy is-sharalar uiymdastyrylýda. Sonyń biri – Shańyraq kúni qarsańynda bas keńsede ótken ulttyq oiyndar saiysy, dep habarlaidy Dalanews.kz.
Atalǵan is-sharanyń basty maqsaty – qyzmetkerler arasynda ulttyq murany nasihattaý, dástúrli oiyndarǵa degen qyzyǵýshylyqty arttyrý jáne ujymdyq birlikti nyǵaitý. Saiys barysynda asyq atý, láńgi tebý jáne toǵyzqumalaq syndy ulttyq oiyn túrleri boiynsha tartysty básekeler ótti.
Ásirese, toǵyzqumalaq oiynyna degen qyzyǵýshylyq erekshe joǵary boldy. Is-sharaǵa arnaiy toǵyzqumalaq federatsiiasynyń mamandary shaqyrylyp, olar qatysýshylarǵa sheberlik saǵatyn ótkizip, oiynnyń qyr-syryn jan-jaqty túsindirdi. Teoriialyq bilim tájiribemen ushtasyp, keiin shaǵyn týrnir uiymdastyryldy. Qatysýshylardyń belsendiligi sonshalyq, jattyqtyrýshylar alyp kelgen 10 oiyn taqtasy da jetpei qaldy. Bul – qyzmetkerlerdiń ulttyq oiyndarǵa degen yqylasy men qyzyǵýshylyǵynyń aiqyn kórinisi.
Ulttyq oiyndar – halqymyzdyń mádeni murasynyń ajyramas bóligi. Olar tek oiyn-saýyq qana emes, sonymen qatar eptilikke, oilaý qabiletine, shydamdylyq pen shapshańdyqqa baýlityn mańyzdy qural. Osyndai is-sharalar arqyly ulttyq qundylyqtar jańǵyryp, urpaqtan urpaqqa jalǵasady.
Kompaniianyń Bas direktory Dýlat Tastekei bul bastamanyń mańyzdylyǵyna toqtaldy.
«Ulttyq oiyndar – bizdiń tarihymyz ben bolmysymyzdyń bir bóligi. Olardy jańǵyrtý arqyly biz tek dástúrdi saqtap qana qoimai, ujym ishindegi yntymaqty nyǵaitamyz. Qyzmetkerlerimizdiń belsendiligi – osy baǵyttaǵy jumystyń nátijeli ekenin kórsetedi», – dedi ol.
Atalǵan is-shara ujym ishinde erekshe serpin berip, áriptester arasynda dostyq qarym-qatynasty nyǵaita tústi. Ulttyq oiyndarǵa degen qyzyǵýshylyqtyń artýy – rýhani qundylyqtarǵa degen qurmettiń belgisi.
Aldaǵy ýaqytta da Naýryznama aiasyndaǵy osyndai mazmundy sharalar TAS GROUP kompaniiasynda jalǵasyn taýyp, ulttyq muramyzdy dáripteýge óz úlesin qosa bermek.
