Zardap shekken kelinshek, qoǵamdyq kólikke sirek minetinin aitady. Alaida, nege ekeni belgisiz, sol kúni eki balasyn ertip, ata-anasyna barmaq bolǵan ol qandai da bir sebeptermen qoǵamdyq kólikke mingen. Avtobýs temirjol ótkelinde turyp qalyp, "poiyz jaqyndady" dep el shýlaǵanda áiel sasqalaqtap, esi shyǵyp ketkenin aitady.
- Bir-aq sát. Búkil jolaýshylar shýlap ketti, esikti ash dep bári aiqailady, júrgizýshiniń de esi shyǵyp ketti. Men avtobýs salony artynan alǵa jetemin degenshe, eldiń bári syrtqa shyǵyp ketti. Biz úlgermei qaldyq. Basynda biz avtobýstyń ortasynda otyrǵanbyz, júrgizýshi aldymen aldyńǵy esikti ashty, sodan keiin ǵana ortasyn ashty. Men eki balamen aldyńǵy esikten shyǵamyn dep oiladym. Biraq itere-mitere syrtqa atylǵan halyq meni keiinge ysyra berdi, sóitip biz ishte qalyp qoidyq. Adamdar taptap ketpesin dep balalardy júrgizýshi artyndaǵy oryndyqqa otyrǵyzdym, - deidi Elmira Jánibekova.
Elmira aýrýhana tósegine úsh apta tanylǵan. Oǵan eki óte kúrdeli ota jasalǵan, dárigerler aiaǵynan tik turǵyzǵan ol júrýdi endi úirenip júr. Qazir ol sóileýge qinalady, qolyn da qozǵalta almaidy.
- Qabyrǵalary úgilip ketken, biraq biz onyń gemo jáne pnevmotoraksqa ulasyp ketýine jol bermedik. Keshe biz naýqasty ambýlatoriialyq jaǵdaida em alý úshin úiine bosattyq. Naýqastyń jaǵdaiy qanaǵattanarlyq, úiine shyǵatyn kezde aiaǵynan turǵyzdyq, al aldynda ol tósekke tanylǵan bolatyn. Keshe úiine óz aiaǵymen ketti dep aitsaq ta bolady, - dedi Almaty qalalyq № 7 klinikalyq aýrýhanasynyń Travmatologiia bóliminiń meńgerýshisi Ramazan Áskerov.
Sol apattan zardap shekken áieldiń eki qyzy áli aýrýhanada jatyr. Kenjesi áli komada, al úlkeni esin jidy. Qazir oǵan em-dom sharalary júrgizilip jatyr, aitqandai, bári tegin.
"Elmira Jánibekova materialdyq kómekten úmittinbeidi. Osy ýaqyt ishinde oǵan ákimdikten de, avtobýs deposynan da, QTJ-dan da eshkim habarlaspaǵan. Qalai degenmen de alapat apattan Qudai saqtap aman qalǵan áieldiń ózi qazir qyzdary tezirek saýyǵyp ketse dep duǵa qylady, sóitip sol jantúrshigerlik apatty umytsam dep armandaidy", - deidi telearna tilshisi.
https://youtu.be/9olSjY7K3k0
