Búgingi tańda kásiporyn Qyzylqıa, Qaqpaq aýyl ákimdigine qarasty tórt eldi mekenderge elektr qýatyn shyǵarýdy bastap, synaq merzimin ótkizý jumystaryn júrgizýde. Elektr stansıasy óndirilgen ónimdi Qyzylsengir eldi mekeniniń elektr jelisine qosý úshin «Ońtústik jaryq» mekemesine 1kVt 16,71 teńgeden elektr qýatyn ótkizýde.
«Salem Consultinq» jaýapkershiligi shekteýli seriktestigi 400 mln. teńge qarajat jumsaǵan joba osy aýdandaǵy Úlken kesken kanalynda ornalasqan. Úlken kesken kanalynan 6m³/sek. sý alynyp, 450 metr tómen qaraı elektr stansıasyna kelip, arnaıy qondyrǵylardan ótip saǵatyna 1000 kVt (saǵ/1mVt) elektr qýaty shyǵarylady. Gıdro elektr stansıada jergilikti 12 adam turaqty jumyspen qamtylyp otyr. Bul elektr stansıa aýdannyń elektr qýatyna degen qajettiliginiń besten bir bóligin qamtyp otyr.
Aıta keteıik, Ońtústik Qazaqstandaǵy 844 eldi meken tolyq elektr qýatymen qamtylǵan. Bıyl qazynadan 11,7 mlrd teńge bólinip, 101 eldi mekendi sapaly jáne turaqty elektr qýatymen qamtamasyz etý qurylystary júrýde. Jumys kólemi ótken jylmen salystyrǵanda 10 ese artqan. Onyń ishinde: jyldyń qorytyndysymen 85 eldi mekende qurylys jumystary aıaqtalyp, tozyǵy jetken elektr júıeleri jańartylatyn bolady.
OQO ákiminiń baspasóz qyzmeti
