Taıaýda ǵana «Islam memleketiniń» sodyrlary Iraktyń Nımrýd qalasyndaǵy tarıhı jádigerlerdi talqandap, jurttyń záresin alǵany esimizde. Osy oqıǵadan keıin Kýveıttegi din ýaǵyzdaýshy Ibragım ál-Kendarı Mysyrdaǵy Sfınkstiń músinin qulatyp, talqandaý kerek dep aıdy aspannan shyǵardy.

Ol Muhamed paıǵambar Mekkeni Islam órkenıetiniń altyn besigine aınaldyrǵanda, ondaǵy tas músinderdi talqandaǵanyn eske alyp, paıǵambardyń búgingi urpaqtary Mysyrdaǵy perǵaýyndar dáýirinde salynǵan tas eskertkishterdi talqandaýy tıis ekenin málim etti. Osydan birshama ýaqyt buryn «Islam memleketiniń» basshysy Ábý Bákir ál-Baǵdatı Sfınks eskertkishin talqandap, jer betinen joıýdy óziniń din aldyndaǵy basty paryzy sanaıtynyn aıtqan edi. Endi onyń sózin Kýveıttiń bildeı din ýaǵyzdaýshysy qaıtalap otyr. Muny qalaı túsinýge bolady?