Byltyr aqyn Serikzat Dúisenǵazynyń uly ómirden ótken edi. Arada bir jyl ýaqyt ótti, al sot otyrysy áli jalǵasyp jatyr. Aqynnyń ózi de áleýmettik jelidegi paraqshasynda uly mert bolǵan jerdi kórsetip, áli kúnge deiin sot otyrysy ótip jatqanyn jetkizdi, - dep habarlaidy Dalanews.kz.
Bir kún ishinde on sot otyrysy ótken. Sonyń biri qaraly oqiǵa bolǵan jerde, iaǵni Elikti parkte ótkizilgen.
"Álihanymnyń sońǵy kórgen jeri. Osy jerde kóshpeli sot otyrysy ótedi. Ardaqty aǵaiyn, Álihanymnyń sońǵy demi úzilgen jer. Anaý talǵa soǵylǵan ǵoi. Ainalaiyn-ai deseishi", - dedi ol.
Serikzat Dúisenǵazynyń sózinshe, kelesi tarap kinásin moiyndamai otyr.
"Elikti degen osy mine. Eshqaisyn áli jappaǵan, ashyq tur bári. Moiyndamaidy, Shymbulaqta da, basqa jerde de solai deidi. Sottyń aldynda da jańa daýlasyp qaldyq. Bizde zań da, iman da - bári óte álsiz eken. Sony baiqap otyrmyn. Bul jigitterde áli iman joq. Adam ólip jatsa da, ormandy qorshaýǵa bolmaidy dep daý shyǵaryp otyr", - deidi aqyn.
Aita keteiik, buǵan deiin aqyn Serikzat Dúisenǵazy uly Álihannyń qazasyna bailanysty tergeý aiaqtalǵanyn málimdedi.
2023 jyly 2 qańtarda ómirden ótken Álihannyń qazasyna bailanysty uzaqqa sozylǵan tergeý jumysyn Aqmola oblystyq Ishki ister basqarmasynyń tergeýshileri 2023 jyly qazanda aiaqtaǵan.
Serikzat Dúisenǵazynyń aitýynsha, demalys aimaǵyndaǵy qaýipsizdik úshin bul mekeme jaýap bermeitin bolyp shyqqan.
