Qazaqstanda qoǵamdyq oryndarǵa zańsyz graffiti salatyndardy jedel anyqtaý úshin «Vandalizm qaýpi bar aimaqtar kartasyn» engizý usynyldy. Depýtattar bul usynysty Úkimetke joldaǵan depýtattyq saýalda kóterdi, dep habarlaidy dalanews.kz.
Quryltai depýtaty Meirambai Kemalovtyń aitýynsha, qala infraqurylymynyń búlinýi men ruqsat etilmegen graffiti máselesi ózekti bolyp otyr. Depýtat bul másele Memleket basshysynyń zańsyz graffitige qatań tosqaýyl qoiý jáne mundai áreketterdi vandalizm men buzaqylyqqa teńestirý jónindegi tapsyrmasynan keiin erekshe mańyzǵa ie bolǵanyn atap ótti.
Depýtattyń málimetinshe, Ákimshilik quqyq buzýshylyq týraly kodekstiń 434-baby boiynsha 20-30 táýlikke deiin ákimshilik qamaqqa alý jáne Qylmystyq kodekstiń 294-baby boiynsha qylmystyq jaýapkershilik qarastyrylǵanyna qaramastan, qoǵamdyq oryndardaǵy múlikti búldirý faktileri áli de kezdesedi.
Meirambai Kemalov zańsyz graffitidiń taralýyna birneshe faktor áser etetinin aitty. Sonyń biri – quqyq buzýshylyqty «izin sýytpai» anyqtaý jáne kinálilerdi jedel belgileý múmkindiginiń jetkiliksizdigi.
Depýtattyń aitýynsha, mundai áreketter kóbine túngi ýaqytta birneshe minýttyń ishinde jasalady. Quqyq buzýshylar betperde nemese kapiýshon paidalanyp, ǵimarattardyń qasbetterin, aialdamalardy, jerasty ótkelderin jáne basqa da qoǵamdyq oryndardy nysanaǵa alady.
Osyǵan bailanysty Ishki ister ministrligine «Qylmystyq quqyq buzýshylyqtar kartasyna» uqsas «Vandalizm qaýpi bar aimaqtar kartasyn» qurý usynyldy. Karta eldi mekenderdegi vandalizm jii jasalatyn aýmaqtardy geografiialyq koordinattar boiynsha naqty ýaqyt rejiminde kórsetýi tiis.
Sonymen qatar depýtattar quqyq buzýshylyqtardy jedel anyqtaý úshin qoldanystaǵy tsifrlyq júielerdi, onyń ishinde «Sergekti» paidalana otyryp, beineanalitika men tulǵany taný algoritmderin biriktirýdi usyndy.
Budan bólek, Ishki ister ministrligine táýekeli joǵary aýmaqtarda táýlik boiy beinebaqylaýdy kúsheitý, patrýldeý, jaryqtandyrý jáne abattandyrý sharalaryn kúsheitý usynyldy.
Depýtattar zańsyz graffitige balama retinde strit-artpen ainalysýǵa arnalǵan arnaiy oryndar bólýdi de usyndy. Osy maqsatta jergilikti atqarýshy organdarǵa kóshe sýretshilerine arnalǵan qabyrǵalar men alańdar belgileý usynyldy.
Al Oqý-aǵartý, Mádeniet jáne aqparat ministrlikterine jastar arasynda zańsyz graffitidiń quqyqtyq saldary týraly túsindirý jumystaryn kúsheitý usynyldy.
Ónerkásip jáne qurylys ministrligine qalalar men eldi mekenderdi abattandyrýdyń úlgilik qaǵidalaryna zańdy strit-art máselelerin retteitin ózgerister engizý usynyldy.
Depýtattar sondai-aq zańsyz salynǵan sýretterdi jedel óshirý nemese nysandardy bastapqy qalpyna keltirý úshin jergilikti atqarýshy organdar janynan jedel toptar qurýdy usyndy.
Usynystardy depýtattar Úkimetke, Bas prokýratýraǵa, Ishki ister ministrligine jáne birqatar memlekettik organdarǵa joldady.
