Kólik prokýratýrasy jyl basynan beri kásipkerlerge negizsiz qysym kórsetý faktilerin anyqtady, dep habarlaidy dalanews.kz.
Qadaǵalaý organynyń málimetinshe, 2026 jyldyń alǵashqy tórt aiynda biznes sýbektileriniń quqyqtarynyń buzylýyna qatysty birneshe jaǵdai tirkelgen. Tekserý qorytyndysymen tórt laýazymdy tulǵa ákimshilik jaýapkershilikke tartylǵan.
Anyqtalǵan faktilerdiń biri Pavlodar oblysynda bolǵan.
«QTJ Júk tasymaly» JShS Pavlodar júk tasymaly bólimshesi men «SVH Ekibastýz» JShS «Ertis Agro» ÁKK-niń júgi tielgen vagondaryn zańsyz ustap, investor qyzmetiniń toqtap qalýyna sebep bolǵan.
Pavlodar kólik prokýratýrasynyń aralasýynan keiin qoiylǵan shekteýler alynyp tastalyp, kináli tulǵalar ÁQBtK-niń 173-baby boiynsha jaýapqa tartylǵan.
Osyndai jaǵdai Shyǵys Qazaqstan oblysyndaǵy «Maiqapshaǵai» keden beketinde de anyqtalǵan.
Málimetke sáikes, otandyq óndirýshi «Format Mach Company» JShS óz ónimin keden organdarynyń áreketterine bailanysty 20 kúnnen astam ýaqyt boiy shyǵara almaǵan.
Shyǵys Qazaqstan kólik prokýratýrasynyń qadaǵalaý aktilerinen keiin shekteýler joiylyp, jaýapty tulǵa ákimshilik jaýapkershilikke tartylǵan.
Kólik prokýratýrasy kásipkerlerge qysym kórsetý áreketteri toqtatylatynyn jáne zań buzǵandardyń jaýapkershilikke tartylatynyn málimdedi.
