Senator Maminge: «800 infektsionistiń orny bos turǵanyn aitty»
Senator óńirlerge sapary kezinde jergilikti jerdegi densaýlyq saqtaý salasynda sheshimin tappai jatqan birqatar kúrdeli máselelerdiń bar ekenine kóz jetkizipti. Sondai-aq, ol otandyq meditsina naryǵy aýyr synaqqa tótep bere almaǵanyn tilge tiek etti.
– Qanshama qabyldanǵan sharalarǵa qaramastan Densaýlyq saqtaý ministrligi halyq densaýlyǵyn qorǵaýdy damytýdyń júieli jolyn taba almaǵany túsiniksiz, – dedi M.Baqtiiaruly.
Depýtattyq saýal barysynda keleshekte pandemiia kezeńinde oryn alǵan jaǵdaidan qorytyndy shyǵaryp, sala mamandarynyń pikirleri men usynystaryn eskerý kerek ekeni de aityldy.
Murat Baqtiiaruly otandyq dári-dármekterdiń tegin meditsinalyq kómektiń kepildik berilgen kólemi sheńberinde jáne mindetti áleýmettik meditsinalyq saqtandyrý júiesindegi úlesi bar-joǵy 26 paiyzdy quraitynyn aityp, qalǵan 74 paiyz sheteldikterdiń úlesinde ekenine basa mán berdi.
Sonymen qatar meditsina salasyndaǵy maman tapshylyǵy da nazardan tys qalmady.
– Qazir emdeý oryndarynda 4 myń dáriger jetispeidi. Ásirese, reanimatolog, rentgenolog, pýlmonolog, taǵy basqa da osy siiaqty salalalyq mamandardyń tapshylyǵy qatty bilinedi. Tipti, koronavirýstyń qaýpi seiilmei turǵan iri ortalyqtar men óńirlerdegi aýrýhanalar men emhanalarda 800-den astam infektsionistiń orny bos tur, – dedi senator.
Depýtattyń aitýynsha, qazirgi tańda dáriger kadrlarymen qamtamasyz etý qalalyq jerde – 56,8 paiyz bolsa, aýylda bul kórsetkish 16,1 paiyzdy quraidy. Qazaqstanda meditsina mamandaryn daiarlaityn alty joǵary oqý orny bar. Ondaǵy salalyq mamandar daiarlaityn meditsinalyq-profilaktikalyq fakýltetter jabylyp qalǵan. Fakýltet jabylǵanymen, mamandardyń qajettigin ómir kórsetip otyr.
– Ult densaýlyǵy – myqty memleket kepili. Sondyqtan adam densaýlyǵy úshin aianbai eńbek etip, ajalǵa arasha túsetin dárigerler qaýymyna arnap, «Dárigerler mártebesi týraly» zań qabyldaýdy usynamyz, – dedi M.Baqtiiaruly.
