Semeidiń 120 áskeri qyzmetkeri jańa páterlerge ie boldy
Semeide 60 páterli eki turǵyn úii paidalanýǵa berildi. Iýnost aýdanynda salynǵan jańa qyzmet páterdiń kiltteri Semei garnizony «Shyǵys» óńirlik qolbasshylyǵynyń áskeri qyzmetkerlerine tabystaldy. Ondaǵy eki bólmeli páterler bir-eki balasy bar, al úsh bólmeli páterler úshten joǵary balalary bar otbasylarǵa arnalǵan. Qonys ielerin jańa baspanalarymen quttyqtaǵan aimaq basshysy, bul turǵyn úiler Qorǵanys ministrliginiń áskeri qyzmetshilerdi qyzmettik páterlermen qamtamasyz etý jospary aiasynda salynǵanyn jetkizdi.
– Men jańa qonys ielerin búgingi qýanyshty kúnmen quttyqtaimyn. Óitkeni, jańa baspanaǵa qol jetkizý – bul úlken mereke jáne bul áskeri qyzmetkerlerdi qyzmettik páterlermen qamtamasyz etý jónindegi Qorǵanys ministrliginiń jospary aiasynda iske asyrylyp otyr. Sonyń arqasynda mine búgin oblysta 120-dan astam páter qoldanysqa berildi. Jańa úilerdiń shańyraǵyna baqyt tileimin. Óitkeni sizderge Otanymyzdy qorǵaý deitin asa mártebeli mindet júktelgen. Sizder sol senimdi aiqtaisyzdar dep oilaimyn, – dedi Danial Ahmetov.
Jalpy, Prezident tapsyrysyna sáikes elimizdiń qorǵanys salasynda eńbek etip júrgen qyzmetkerlerdi jan-jaqty áleýmettik qoldaý úshin naqty jumystar atqarylýda. Áskeri qyzmetkerlerdiń otbasylaryn turǵyn úimen qamtamasyz etý osy baǵyttaǵy mańyzdy isterdiń biri bolyp tabylady. Atalǵan baǵdarlamany júzege asyrý aiasynda Semeidiń áskeri bólimderi shoǵyrlanǵan Iýnost kentinde tórt turǵyn úi salynǵan.
ShQO ákiminiń baspasóz qyzmeti
https://dalanews.kz/33465
