Semei qalasynda buzaqylardyń áreketinen zardap shekken 11 jastaǵy balaǵa QR Ishki ister ministrliginiń «Dinamo» dene shynyqtyrý-sport qoǵamy qoldaý kórsetti, - dep habarlaidy Dalanews.kz.
IIM málimetinshe, Semei qalasyndaǵy buzaqylyq oqiǵasy qazaqstandyqtardy bei-jai qaldyrmady, qoǵamnyń jappai qoldaýynyń arqasynda mektep oqýshysy men onyń otbasy jalǵyz emes ekenin sezindi.
"Bul iske politsiia vedomstvosynyń basshylyǵy erekshe mán berip, tergeýdi jeke baqylaýyna aldy. Jasóspirimniń bolashaǵyna alańdaýshylyq bildirgen QR Ishki ister ministrliginiń «Dinamo» dene shynyqtyrý-sport qoǵamy ony óz qamqorlyǵyna alyp, sport arqyly jigerlendirmek. Dinamolyqtar balaǵa tálimgerlik kórsetip, senimdiligin nyǵaitýǵa, ózin qorǵai bilýge úiretýdi maqsat tutyp otyr", - dep jazylǵan málimette.
Abai oblysy Politsiia departamentiniń bastyǵy Bektóre Sultan Semeidegi «Dinamo» sport kesheninde jasóspirimdi qarsy alyp, oǵan jas sportshylarmen birge zaldy aralatyp, jattyǵý protsesin tanystyrdy.
"Oqýshy ózin eshqashan jalǵyz sezinbeýi úshin bar kúshimizdi salamyz. Sport tek deneni shynyqtyrý ǵana emes, ol minezdi qalyptastyryp, qiyndyqtardy jeńýge úiretedi. Eń bastysy – sporttyq orta naǵyz otbasy siiaqty, senimdi tirek bola alady", – dep atap ótti departament basshysy.
Bala boksshylardyń jattyǵýyn qyzyǵýshylyqpen tamashalaǵan. Bul sport túri oǵan burynnan unaitynyn aitqan jasóspirim endi «Dinamo» mamandandyrylǵan jattyqtyrýshylarynyń jetekshiligimen tegin jattyǵý múmkindigine ie boldy. Sol kúni-aq ol alǵashqy soqqysyn boks grýshaǵa baǵyttap, óz kúshin synap kórdi.
Buǵan deiingi oqiǵa
Buǵan deiin Abai oblysynyń politsiiasy qylmystyq is qozǵaǵan bolatyn. Bul oqiǵa áleýmettik jelilerde keńinen tarap, qoǵamda úlken rezonans týdyrdy.
Semeide arnaiy komissiia osy oqiǵaǵa bailanysty sheshim shyǵardy. Qazir bul iske qatysty materialdar sotqa joldandy. Kámeletke tolmaǵandar isi jónindegi sot jasóspirimder mamandandyrylǵan mekemede qansha ýaqyt bolatynyn anyqtap, ata-ana quqyǵynan aiyrý máselesi boiynsha túpkilikti sheshim shyǵarady.
Sondai-aq, qazaqstandyqtar Semeide soqqyǵa jyǵylǵan oqýshynyń otbasyna 24 mln teńge jinap berdi.
