Kúni keshe ǵana Úkimet otyrysynda Abai oblysynyń jylý berý maýsymyna daiyndyq barysy talqylanǵanyn ákimdik habarlaǵan-dy.
Ákimdiktiń málimetinshe, óńirde jylý jelileri men kózderin qaita jańǵyrtý jumystary qarqyndy júrip jatyr. Abai oblysynda 23,9 mlrd teńgege bólinip, jylý jelileri men kózderin qaita jańǵyrtý jumystary júrgizilýde.
Búginde bul baǵyttaǵy jumystar aiaqtalýǵa jaqyn. Tiisti mekemeler jóndeý jumystarynyń 85 paiyzǵa oryndalǵanyn, al aidyń sońyna deiin barlyq jumystardyń aiaqtaityndaryn alǵa tartty.
Óńirdiń jylytý maýsymy kezinde kómirge degen qajettiligi 1,245 mln tonnany quraidy. Búginde oblystaǵy jylý elektr stantsiialary men jylý ortalyqtaryndaǵy kómirdiń qory 48 myń tonnany quraidy. Osylaisha normativke sáikes jylý kózderine kómir qamtý isi qazir tańda 181%-dy qurap otyr.
Al oblys turǵyndaryn kómirmen qamtý 34 paiyzdy quraǵan. Óńirde kómirdi biýdjettik uiymdarǵa ýaqytynda jetkizý jumystary da josparǵa sai júrip jatyr.
Ákimdik Ǵabbasov atyndaǵy jylý ortalyǵyndaǵy jóndeý jumystaryn 30 qyrkúiekke deiin tolyq aiaqtaýdy kózdep otyr. Munda qýattylyǵy 20 Gkal/saǵat qosymsha qazandyq qondyrǵysy ornatylǵan. Sonymen qatar №4 qazandyqty montajdaý jumystary aiaqtalyp, iske qosý jumystary júrgizilýde.
– Búginde jylý ortalyǵynyń №2 jáne №3 qazandyqtaryndaǵy jóndeý jumystary 80 paiyzdy qurady. Bul – qazandyqtar jylytý maýsymynyń basyna deiin daiyn bolady. Al №1 qazandyq rezervtik qazandyq bolyp tabylady, ony 30 qazanǵa deiin iske qosamyz. Óńirdiń jylytý maýsymyna daiyndyq jumystary meniń jeke baqylaýymda, – dedi oblys ákimi Nurlan Uranhaev.
Óńirde aldaǵy jylý maýsymyna daiyndyqtyń jalpy barysy bekitilgen josparǵa qatań sáikestikte júrgizilýde.
