كۇنى كەشە عانا ۇكىمەت وتىرىسىندا اباي وبلىسىنىڭ جىلۋ بەرۋ ماۋسىمىنا دايىندىق بارىسى تالقىلانعانىن اكىمدىك حابارلاعان-دى.
اكىمدىكتىڭ مالىمەتىنشە، وڭىردە جىلۋ جەلىلەرى مەن كوزدەرىن قايتا جاڭعىرتۋ جۇمىستارى قارقىندى ءجۇرىپ جاتىر. اباي وبلىسىندا 23،9 ملرد تەڭگەگە ءبولىنىپ، جىلۋ جەلىلەرى مەن كوزدەرىن قايتا جاڭعىرتۋ جۇمىستارى جۇرگىزىلۋدە.
بۇگىندە بۇل باعىتتاعى جۇمىستار اياقتالۋعا جاقىن. ءتيىستى مەكەمەلەر جوندەۋ جۇمىستارىنىڭ 85 پايىزعا ورىندالعانىن، ال ايدىڭ سوڭىنا دەيىن بارلىق جۇمىستاردىڭ اياقتايتىندارىن العا تارتتى.
ءوڭىردىڭ جىلىتۋ ماۋسىمى كەزىندە كومىرگە دەگەن قاجەتتىلىگى 1،245 ملن توننانى قۇرايدى. بۇگىندە وبلىستاعى جىلۋ ەلەكتر ستانسيالارى مەن جىلۋ ورتالىقتارىنداعى كومىردىڭ قورى 48 مىڭ توننانى قۇرايدى. وسىلايشا نورماتيۆكە سايكەس جىلۋ كوزدەرىنە كومىر قامتۋ ءىسى ءقازىر تاڭدا 181%-دى قۇراپ وتىر.
ال وبلىس تۇرعىندارىن كومىرمەن قامتۋ 34 پايىزدى قۇراعان. وڭىردە كومىردى بيۋدجەتتىك ۇيىمدارعا ۋاقىتىندا جەتكىزۋ جۇمىستارى دا جوسپارعا ساي ءجۇرىپ جاتىر.
اكىمدىك عابباسوۆ اتىنداعى جىلۋ ورتالىعىنداعى جوندەۋ جۇمىستارىن 30 قىركۇيەككە دەيىن تولىق اياقتاۋدى كوزدەپ وتىر. مۇندا قۋاتتىلىعى 20 گكال/ساعات قوسىمشا قازاندىق قوندىرعىسى ورناتىلعان. سونىمەن قاتار №4 قازاندىقتى مونتاجداۋ جۇمىستارى اياقتالىپ، ىسكە قوسۋ جۇمىستارى جۇرگىزىلۋدە.
– بۇگىندە جىلۋ ورتالىعىنىڭ №2 جانە №3 قازاندىقتارىنداعى جوندەۋ جۇمىستارى 80 پايىزدى قۇرادى. بۇل – قازاندىقتار جىلىتۋ ماۋسىمىنىڭ باسىنا دەيىن دايىن بولادى. ال №1 قازاندىق رەزەرۆتىك قازاندىق بولىپ تابىلادى، ونى 30 قازانعا دەيىن ىسكە قوسامىز. ءوڭىردىڭ جىلىتۋ ماۋسىمىنا دايىندىق جۇمىستارى مەنىڭ جەكە باقىلاۋىمدا، – دەدى وبلىس اكىمى نۇرلان ۇرانحايەۆ.
وڭىردە الداعى جىلۋ ماۋسىمىنا دايىندىقتىڭ جالپى بارىسى بەكىتىلگەن جوسپارعا قاتاڭ سايكەستىكتە جۇرگىزىلۋدە.
