Semeide tankter men ózge de brondy tehnikany jóndeýge mamandanǵan "Semei injiniring" kásiporny jekeshelendirilmek. "Qazaqstan injiniring" ulttyq kompaniiasyna tiesili zaýyttyń bastapqy baǵasy 70,8 mlrd teńge bolyp belgilendi, dep habarlaidy dalanews.kz.
e-Qazyna elektrondy saýda alańyndaǵy málimetke sáikes, aýktsionǵa kásiporynnyń 2 608 500 jai aktsiiasy, iaǵni jarǵylyq kapitalyndaǵy 100 paiyz úlesi qoiylǵan. Saýda 27 qarashada saǵat 11:00-de baǵany kóterý ádisimen ótedi. Qatysýshylar 10,625 mlrd teńge kóleminde kepildik jarna tóleýge tiis.
Zaýytty satyp alý úshin bastapqy somany tóleý jetkiliksiz. Jańa menshik iesine kásiporynnyń "Qazaqstan injiniring" aldyndaǵy 2,87 mlrd teńge qaryzyn óteý mindeti de júkteledi. Bul bereshek 2014 jylǵy dividendterge bailanysty qalyptasqan. Osylaisha, investordyń jalpy qarjylai mindettemesi keminde 73,7 mlrd teńgege jetýi múmkin. Bul somaǵa óndiristi jańǵyrtýǵa qajet qosymsha investitsiialar kirmeidi.
Satyp alýshy kásiporynnyń negizgi qyzmet baǵytyn saqtap, áskeri tehnikany jóndeý jáne jańǵyrtý jumystaryn jalǵastyrýǵa mindetti. Sonymen qatar memlekettik qorǵanystyq tapsyrystardy ýaqytyly oryndaý, azamattyq ónim shyǵarýdy toqtatpaý, jańa tehnologiialar engizý jáne jumys oryndaryn qysqartpaý talap etiledi. Qazir zaýytta orta eseppen 349 adam eńbek etedi.
Jańa menshik iesine aktsiialardy satyp alǵannan keiingi alǵashqy 12 aida qaita satýǵa, kepilge qoiýǵa nemese ózge tulǵanyń basqarýyna berýge tyiym salynady.
"Semei injiniring" kásiporny T-72 tankterin, jaiaý áskerdiń jaýyngerlik mashinalaryn, bronetransporterlerdi, áskeri avtomobilder men injenerlik tehnikany kúrdeli jóndep, jańǵyrtady. Onyń óndiristik bazasy brondy tehnikany jóndeýdiń tolyq tsiklin atqarýǵa múmkindik beredi.
Zaýyttyń tarihy 1976 jyldan bastalady. Alǵashqy óndiristik kesheni 1987 jyly iske qosylǵan. 17,4 gektar aýmaqty alyp jatqan kásiporynda Keńes Odaǵy kezinde 1,5 myńǵa jýyq adam jumys istegen. 2004 jyly onyń memlekettik aktsiialar paketi "Qazaqstan injiniring" ulttyq kompaniiasyna berildi.