Semei qalasyndaǵy Shygys Mall saýda jáne oiyn-saýyq ortalyǵynda áieldiń aiaǵy eki eskalatordyń arasyndaǵy sańylaýǵa qysylyp qaldy, dep habarlaidy dalanews.kz.
Kýágerlerdiń aitýynsha, áiel ózdiginen shyǵa almaǵandyqtan, oqiǵa ornyna qutqarýshylar shaqyrylǵan.
Abai oblysynyń Tótenshe jaǵdailar departamenti mamandary gidravlikalyq quraldyń kómegimen eki eskalatordyń arasyndaǵy tehnikalyq sańylaýdy keńeitip, 1990 jyly týǵan áieldiń aiaǵyn bosatty.
"Oqiǵa ornyna jetken jedel-qutqarý jasaǵynyń qyzmetkerleri gidravlikalyq quralmen eki eskalatordyń arasyndaǵy tehnikalyq sańylaýdy keńeitip, áieldi qutqardy", – dep habarlady vedomstvo.
Qutqarylǵan áiel meditsinalyq tekserýden ótip, qajetti kómek alýy úshin jedel járdem qyzmetkerlerine tapsyryldy. Onyń qazirgi jaǵdaiy týraly qosymsha aqparat berilgen joq.
