Abai oblysyndaǵy «Semei ormany» memlekettik orman tabiǵi rezervatynda orman órtin sóndirý jumystary jalǵasyp jatyr. Qazirgi ýaqytta tilsiz jaýmen kúreske bes tikushaq pen 350-den astam adam jumyldyrylǵan, dep habarlaidy dalanews.kz.
2026 jylǵy 16 shilde saǵat 14:50-degi jaǵdai boiynsha órtti sóndirýge rezervattyń memlekettik orman kúzetiniń 97 qyzmetkeri men 38 tehnikasy, QR Tótenshe jaǵdailar ministrliginiń 158 qyzmetkeri men 22 tehnikasy, QR Ishki ister ministrliginiń 101 qyzmetkeri men 25 tehnikasy tartyldy.
Sonymen qatar órtti aýyzdyqtaýǵa «Qazaviaormanqorǵaý» RMQK-nyń eki tikushaǵy, QR Qorǵanys ministrliginiń Mi-17 jáne QR Ulttyq qaýipsizdik komitetiniń Mi-8 tikushaqtary qatysýda.
Áýe tehnikasy arqyly jalpy 82 ret sý tógý jumystary júrgizilgen. Onyń ishinde «Qazaviaormanqorǵaý» tikushaqtary 58 ret, Qorǵanys ministrliginiń Mi-17 tikushaǵy 19 ret, al UQK-niń Mi-8 tikushaǵy 5 ret sý tókken.
Aldyn ala málimet boiynsha, órttiń jalpy aýmaǵy shamamen 60 gektardy quraidy. Órt qaraǵaily orman alqabynda tirkelgen, kei jerlerde tómengi órt joǵarǵy órtke ulasqan.
Qazirgi ýaqytta órtti oqshaýlaý jáne tolyq sóndirý jumystary jalǵasyp jatyr.
Úkimettiń málimetinshe, jaǵdaidy Premer-ministr jeke baqylaýynda ustap otyr. Jaýapty memlekettik organdardyń basshylary oǵan saǵat saiyn jedel aqparat berýde.
