Al istiń osylai jumsarýyna sot saraptamasy sebep bolǵan kórinedi, dep habarlaidy KTK arnasy.
Alaida burynǵy ákimnen taiaq jedim degen Dias Muqannyń anasy balasynyń jeńil jaraqat alǵany týraly saraptama qorytyndysyna sene alar emes. Dál osy sebepti qaitadan saraptama taǵaiyndatyp, ákimdi jazalamaq niette.
14 jastaǵy Dias Muqannyń ata-anasynyń sózinshe, eks-ákim anasy men aýdan depýtattaryn araǵa salyp, jábirlenýshilerdi keshirim berýge májbúrlep júrgen kórinedi.
«Olar meniń balamdy oilamaidy. Keshirimmen keldi. Alaida balamdy emdetý, sol arqyly kómek berý týraly oilamady. Oilap otyrǵandary – tek Janat Omarovtyń jaǵdaiy. Soqqy saldarynan balam kemis bolyp qalsa ne ister edi?» – deidi Diastyń ákesi Tólegen Kúlpeiisov.
Al aýdandyq sýdianyń sózinshe, bul iske qatysty saraptama taǵaiyndalyp, onyń qorytyndysy shyqqandyqtan, Janat Omarovty qylmystyq jaýapqa tarýǵa aitarlyqtai sebep joq. Saraptama qorytyndysy boiynsha, Diastyń alǵan jaraqaty jeńil. Istiń ákimshilikke aýystyrylýyna dál osy saraptama qorytyndysy sebep bolypty.
«Sot-meditsinalyq saraptamanyń qorytyndysy shyqty. Onda jasóspirimniń densaýlyǵyna jeńil jaraqat keltirilgeni kórsetilgen. Sondyqtan Omarovty qylmystyq jaýapkershilikke tartýǵa negiz joq», – deidi Qorǵaljyn aýdany sotynyń tóraǵasy Daniiar Temirhanov.
Alaida Diastyń ata-anasy saraptama qorytyndysymen kelispei otyr. Olardyń sózinshe, uldary aiǵa jýyq ýaqyt emdelse de, áli de tolyq saýyqpapty. Sondai-aq, soqqy saldarynan únemi basy aýyratyn kórinedi. Osy sebepti olar istiń toqtatylǵanyna qarsy. Olar eks-ákimdi jazaǵa tartý úshin, qaitadan saraptama taǵaiyndaýǵa ótinish bildirgen.
Diastyń ata-anasynyń áreketin sýdia qoldap, ekinshi ret saraptama taǵaiyndaǵan. Qaitadan taǵaiyndalǵan saratama bir aiǵa jýyq jasalýy múmkin.
Qazirgi ýaqytta Dias Muqan internatqa qaita oralǵan. Alaida kóp sabaqty jiberip alǵandyqtan, úlgerimine áserin tigizbei qoimapty.
Ekinshi qaitara taǵaiyndalǵan saraptama nátijesi ózgermese, burynǵy ákimge qatysty 35 myń teńge aiyppul nemese 15 táýlikke qamaý túrindegi ákimshilik jaza taǵaiyndalýy múmkin. Al saraptama qorytyndysy Diastyń densaýlyǵyna aitarlyqtai zaqym kelgenin rastasa, Janat Omarov eki jylǵa deiin bas bostandyǵynan aiyrylýy yqtimal.
Esterińizge sala ketsek, Aqmola oblysynda 8-synyp oqýshysyn soqqyǵa jyqqan Qorǵaljyn aýyldyq okrýginiń ákimi Janat Omarovtyń ústinen is qozǵalǵan edi. Ol Tóleýbaev atyndaǵy orta mekteptiń oqýshysy Dias Muqandy soqqyǵa jyǵyp, densaýlyǵyna ziian keltirgen.
