«Myna qazirgi ýaqytta komissiia aimaqtardy aralap júr. Men ózim aýyldanmyn, naǵyz halyq arasynda júremin. Aýylda toi bolsa da, qaza bolsa da, áńgimeniń bári jer qazir. Halyqtyń senimin qaitarý úshin birinshi mynaý kelgende, Qostanaiǵa barady ǵoi komissiia, sonda árbir selolyq okrýgtan bir-bir adamnan jinaý kerek. Onsyz bolmaidy. Áitpese, keledi de, jergilikti basshylar men siiaqty jinalady, halyqtyń pikiri solai... Bir-bir okrýgtan jinaiyq. Qostanaida úlken zaldar bar. Sonda durys bolady. Osy oraida bir jaǵdaidy aita keteiin, jaqynda 90-nan asqan bir aqsaqalmen otyrdym men. Ol aitady, Sairan men senderdiń bireýińe de senbeimin. Báriń sol jerde turasyńdar, sen de olarmen birgesiń deidi. Mine, ol – halyqtyń pikiri», – deidi S.Býkanov. Onyń aitýynsha, aýylda otyrǵan halyq jaiylym máselesin sheship berýdi suraidy.
Aita keteiik, búgin Astanada ótken jer komissiiasynyń búgingi otyrysynda óz azamattarymyzǵa jerdi jalǵa berý máselesi talqylandy. Osy másele aiasynda bir qolǵa beriletin jerdiń shekti kólemi, jaiylymdyq jerlerdi jalǵa bermeý jáne taǵy basqa mańyzdy máseleler boiynsha usynystar aityldy.
Búginde komissiia shtaby qazaqstandyqtarǵa jerdi jalǵa berý máselesi boiynsha naqty usynystardy ázirlep qoidy. Sonyń negizinde Jer kodeksiniń bir babyna ózgerister engizý kózdelgen. Osyǵan qatysty saiasattanýshy Dos Kóshim de ózi basqaratyn toptyń usynystaryn jariialady. Onyń oiynsha, barlyq aýyldyq okrýgtardan bir-bir adam jer taratyn komissiianyń múshesi bolýy qajet.
Al aýdandyq prokýror komissiianyń jumysyn baqylaý otyrýy shart. Otyrys sońynda shý shyqqanyn aita ketken jón. Jýrnalisterge suhbat bergen Úkimet basshysynyń orynbasary-aýyl sharýashylyǵy ministri, komissiia tóraǵasy Asqar Myrzahmetov 10 sotyqqa qajetti aýyl sharýashylyǵy jerlerin satyp alý máselesiniń qaralyp jatqanyn jetkizdi. Al qoǵam qairatkeri Muhtar Taijan igerilmei jatqan jerler týraly aitqanda jat jerde júrgen qandastyrymyzdy umytpaý qajet dep otyr.
Arman ASQAROV
