Qazaqstan Úkimetiniń Reseı Sberbankimen sıfrlyq úkimet platformasyn qurý týraly kelisimi qoǵamda úlken daý týdyrdy.
«Aq jol» demokratıalyq partıasynyń fraksıasy ótken jyldary jekelegen mınıstrlikterdiń, jalpy alǵanda sıfrlyq damý máselesiniń aqparattyq júıeler jumysyndaǵy sátsizdikterin birneshe ret synǵa alǵan edi.
Qoldanystaǵy platformalardyń qabiletsizdigi ásirese ótken jyldyń kókteminde pandemıa bastalǵan soń densaýlyq saqtaý, áleýmettik qamsyzdandyrý, bilim berý, salyq salý, aýyl sharýashylyǵy jáne basqa da kóptegen elektrondyq qyzmetterdiń kemshilikteri aıqyn boldy.
Sol kezdiń ózinde memlekettiń jyldar boıy sıfrlandyrýǵa bólingen mıllıardtaǵan qarjynyń tıimsiz paıdalanylýy anyqtaldy.
Memlekettik organdar men jaýapty tulǵalardyń jaǵdaıdy túzetý boıynsha jasaǵan áreketteri tıisti nátıje bermedi. Tipti, platformalardyń odan ári alystaýyna, ony azamattar men bıznestiń paıdalanýynyń kúrdelenýine alyp keldi.
Al qazirgi zamanaýı tehnologıalar men jańa álemdik jaǵdaılardy eskere otyryp, Qazaqstan úshin memlekettik qyzmetterdi sıfrlyq damytýda artta qalý problemasy jyl ótken saıyn ótkir bolyp tur. Sondyqtan barlyq memlekettik organdardyń IT-júıelerin biryńǵaı platformaǵa keltirý, zamanǵa saı jańǵyrtý qajettigi shynymen de júıeli problemaǵa aınaldy.
Degenmen, birqatar máseleler ashyq kúıinde qalyp otyr.
1) Birinshiden. Atalǵan kelisimdi ótken jyldary sıfrlandyrý baǵdarlamalaryna búdjetten bólingen qarjynyń tıimsiz jumsalǵanyn moıyndaý dep baǵalaýǵa bola ma?
Eger solaı bolsa, onda ótken jyldary memlekettiń naqty qansha qarjysy memlekettik qyzmet kórsetýdi sıfrlandyrýǵa jumsaldy jáne onyń tıimsiz jumsalǵany úshin jaýapkershilik kimniń moınynda?
2) Ekinshiden. Osy Kelisimdi daıyndaý kezinde otandyq nemese eń myqty halyqaralyq IT-kompanıalardyń múmkindikteri eskerildi me? Ony daıyndaý barysy ashyqtyq pen adal básekelestikke qanshalyqty saı boldy?
3) Úshinshiden. Kelisimdi iske asyrý barysynda aqparattyq qaýipsizdik múddeleri qalaı qorǵalady?
Osyǵan baılanysty buqaralyq baspasózde jarıalanǵan sıfrlyq damý jáne aeroǵarysh ónerkásibi mınıstriniń túsindirmeleri jurtshylyqty qanaǵattandyrmaıdy, kerisinshe odan da kóp suraqtar týyndatady. Onyń sebebi serverlerdi Qazaqstanda ornalastyrýda ǵana emes, olarda saqtalatyn aqparatqa bóten tulǵalardyń qoljetimdiligin shekteýdiń tehnologıalyq múmkindigi bar ma degen másele.
Jıyrma birinshi aqparat ǵasyrynda IT qaýipsizdigi bizdiń elimizdiń Táýelsizdiginiń mańyzdy faktory dep sanaımyz.
Jaýaptardy zańda belgilengen merzimde berýlerińizdi suraımyz, – dep depýtattyq saýalda «Aq jol» fraksıasynyń ókilderi ashyq talap qoıdy.
