11 sáýir kúni Óskemende Shyǵys Qazaqstan oblystyq sotynyń appelásıalyq alqasy 12 jylǵa sottalǵan ǵalym, profesor Saıat Ybyraıdy shartty túrde merziminen buryn bosatý týraly ótinish qarap, ony qanaǵattandyrý týraly sheshim shyǵardy. Bul týraly Azattyqqa Saıat Ybyraıdyń advokaty Abzal Quspan habarlady.

– Qazir ǵana sottan shyqtyq. Bizdiń ótinishimiz tolyq qanaǵattandyryldy. Semeı qalalyq sotynyń sheshimi buzyldy. Búgin úlgermeıtin shyǵar. Erteń Saıat Ybyraı shyǵýy kerek, – dedi ol Azattyq tilshisine.

Advokatynyń aıtýynsha, sot sheshimi búginnen bastap kúshine enedi. Buǵan deıin eldegi ǵalymdar, qoǵam qaıratkerleri Saıat Ybyraıdy bosatý jóninde Qazaqstan prezıdentine birneshe márte hat jazǵan. Saıat Ybyraı 2011 jyly "qylmystyq top qurdy" degen aıyppen 12 jylǵa bas bostandyǵynan aıyrylǵan edi.

Ol 2011 jyly jeltoqsanda syrttaı Álıhan Bókeıhan atyndaǵy syılyqqa ıe bolǵan. 2013 jyly qazaqstandyq quqyq qorǵaýshylardan quralǵan sarapshylar toby Saıat Ybyraıdy eldegi "ar-ujdan tutqyndary" qataryna kirgizgen.

 

Derekkózi: Azattyq portaly