13 qazanda "saiasi tutqyn" Kenjebek Ábishev túrmeden shyqty. Sársenbi kúni tańerteń erte Zarechnyidaǵy túrme qyzmetkerleri ony Almaty oblysy Jambyl aýdanyndaǵy úiine jetkizip tastaǵan.
– Keletin kisilerden, aqparat quraldarynan seskengen siiaqty. Onyń ústine olarǵa joǵarydan bas prokýratýradan komissiia kelip jatyr, - dedi túrme ákimshiliginiń áreketine baǵa bergen Kenjebek Ábishev Azattyq tilshisine.
Buǵan deiin jergilikti belsendiler Zarechnyi kentindegi LA-155/14 túzetý mekemesiniń aldynan ony kútip alýdy josparlaǵan. Biraq belsendiler barǵanǵa deiin ony úiine alyp ketken.
27 qyrkúiekte Qapshaǵai qalalyq soty "terrorizmdi nasihattady" degen aiyppen sottalǵan Kenjebek Ábishevtiń shartty túrde merziminen buryn bosap shyǵý týraly ótinishin qanaǵattandyrǵan. Ol "jazasynyń" qalǵan bóligi iaǵni, 2 jyl 4 ai 20 kúndi bostandyǵy shektelgen kúii óteidi.
Almaty oblystyq soty 2018 jylǵy 21 jeltoqsanda Kenjebek Ábishevti "terrorizmdi nasihattady" degen aiyppen jeti jylǵa sottaǵan edi. 2019 jyly apelliatsiialyq sot úkimdi ózgerissiz qaldyrdy. 2020 jylǵy 13 naýryzda Qapshaǵai qalalyq soty jaza merzimin azaitqan.
Qazaqstandyq quqyq qorǵaýshylar Kenjebek Ábishevti saiasi tutqyn dep tanyǵan. Qazaqstan biligi elde saiasi tutqyndar joq dep esepteidi.
