Birneshe depýtat Nazarbaev pen Pýtinniń kezdesýine qatysty pikir bildirdi, - dep habarlaidy Dalanews.kz Orda.kz-ke siltep.
Májilismen Ermurat Bapi bul oqiǵany jaqsylyqtyń belgisi emes dep sanaidy. Bul kezdesýge qatysty óz oiyn onyń áriptesi Aidos Sarym da aitty.
Ermurat Bapidiń pikirinshe, bul kezdesýdiń saiasi astary bar.
"Men ol jerde bolǵan joqpyn. Biraq menińshe, ol (Nazarbaev - red.) qandai da bir kepildikke muqtaj boldy. Nazarbaev otstavkaǵa keter aldynda birinshi kezekte Resei prezidentimen keńesken dep oilaimyn. Ol kepildik aldy, onsyz mundai sheshim qabyldamas edi. Al qazir, múmkin sol kepildikti "jańartý" úshin bardy. Ol áli de qoǵamda óz mańyzdylyǵyn joǵaltpadym dep oilaidy", - dedi depýtat májilis kýlýarynda.
Keibir saiasattanýshylar Pýtin bul kezdesý arqyly Qasym-Jomart Toqaevqa qandai da bir belgi berip, eskertý jasaýda dep sanaidy. Ermurat Bapi bul nusqany qisyndy dep esepteidi.
"Sizder baiqadyńyzdar ma, Táýelsizdik kúnimen TMD elderiniń kóbi, kóptegen shet elder quttyqtady. Aqorda saityna kirińizder, Pýtinniń quttyqtaýy joq. Bul neni bildiredi? Mysaly, men qatty alańdaimyn. Ol bizdiń táýelsizdigimizdi moiyndaǵysy kelmei me? Ótken aptada ǵana Resei Qaýipsizdik keńesi tóraǵasynyń orynbasary Medvedev taǵy qandai da bir elderdi odaqqa qosý múmkindigi týraly aitqan bolatyn. Osy turǵyda ol belgi bergendei. Al bir aptadan keiin Qazaqstan úshin uly kún - Táýelsizdik kúni ótti, biraq Pýtinnen quttyqtaý joq. Mundai jaǵdailardan ártúrli qorytyndy shyǵarýǵa bolady", - dep boljaidy ol.
Sonymen qatar, Ermurat Bapi bul kezdesý ekinshi Qańtardyń belgisi bolýy múmkin degen pikirmen kelispeidi.
"Muny uiymdastyrýǵa eshkimniń kúshi jetpeidi, tipti Pýtindi Qudai dep sanasaq ta. Qańtar oqiǵasy - bul halyqtyq narazylyq, halyqtyń erkin bildirýi. Pýtin tutas qoǵamnyń narazylyǵyn qaita jandandyra almaidy, ol siqyrshy emes qoi. Bul jerde basqa máseleler bar. Saiasattanýshylardyń bul kezdesýdi talqylaýy - qoǵamdy qaita tolqytatyn saiasi tehnologiia. Eski Qazaqstanda bári jaqsy boldy dep eske salý áreketi", - dep atap ótti Ermurat Bapi.
Al basqa depýtat Aidos Sarym bul kezdesýden qaýiptenýdiń qajeti joq dep esepteidi.
"Ol eks-prezident, eshqandai memlekettik qyzmet atqarmaidy. Bul onyń jeke sapary. Pýtinmen uzaq jyldar boiy jumys istegendikten, ony qabyldaǵan shyǵar. Men muny belgi dep sanamaimyn. Ózderińiz kórdińizder, (Qazaqstanǵa saparynan keiin - red.) Pýtin: “Kez kelgen adam Qazaqstanǵa qatysty qandai da bir arandatýshylyqqa jol berse, ol Reseidiń jaýy” dedi. Bul derlik tsitata. Mundai málimdemelerden keiin arnaiy birdeńe jasalmaidy", - dep senim bildirdi Aidos Sarym.
Onyń aitýynsha, "Nursultan Nazarbaevqa qalai qarasaq ta, onyń TMD elderiniń qazirgi jáne burynǵy basshylary arasynda óz orny, qurmeti jáne bedeli bar".
"Olar uzaq joldy birge júrip ótkendikten, oǵan qurmet bar shyǵar, ol sony paidalanǵan bolar. Al qandai máseleler talqylanǵanyn bilmeimiz, bul protokoldan tys bolǵan. Onyń artynda eshqandai memlekettik mindetter turǵan joq. Biz Pýtinge bireýmen kezdesýge tyiym sala almaimyz, bul onyń quqyǵy. Boljam jasap, artyq áńgime aitýdyń qajeti joq", - dedi Aidos Sarym.
Ermurat Bapimen kelise otyryp, ol da bul kezdesýdi Qańtar oqiǵasynyń qaitalanýynyń belgisi dep sanamaidy. Sebebi qazaqstandyqtar "mundai silkinisterden jetkilikti immýnitet aldy" jáne ony qaitalaýdy qalamaidy. Bul, onyń pikirinshe, Táýelsizdik kúni men qoǵamnyń "bot-fermalar men túrli arandatýshylyqtarǵa" reaktsiiasy arqyly aiqyn kórindi.
Aita keteiik, 14 jeltoqsanda Resei prezidenti Vladimir Pýtin óziniń Novo-Ogariovo rezidentsiiasynda Qazaqstannyń eks-prezidenti Nursultan Nazarbaevty qabyldady. Alaida kezdesý týraly eshqandai tolyq aqparat joq.
