Ǵylym jáne joǵary bilim ministri Saiasat Nurbek grantsyz qalǵan túlekterdiń sotqa shaǵymdanýyna qatysty pikir bildirdi, dep habarlaidy Dalanews.kz.
“Sot otyrysy kelesi aptaǵa shegerildi, oflain formatta ótedi. Sot sheshimi sol aptada talqylanady. Negizi, bir ǵana adam shaǵymdanǵan, al qalǵan túlekterdiń máseleleri sheshimin taýyp jatyr. Keibir shaǵymdar sot qaraýynan qaitaryldy,” – dep jaýap berdi Saiasat Nurbek senat dálizinde jýrnalister qoiǵan suraqqa.
Ministr túlekterdiń túsirgen aryzynyń orynsyz ekenin alǵa tartty.
“Bul shaǵymmen kelispeimin. 20 adam sotqa júgindi, olardyń ár jaǵdaiy jeke qarastyryldy. Nátijesinde, 15 adam grantqa ie boldy. Biraq sottyń ózi kei aryzdardyń mánisin túsinbedi,” – dep túsindirdi ol.
Eske salaiyq, sý basqan óńirler úshin bólingen kvotanyń kesirinen joǵary ball jinasa da memlekettik grantqa ilikpei qalǵan talapker birinshi bolyp Ǵylym jáne joǵary bilim ministrligin sotqa bergen edi.
Osy tusta belgili quqyq qorǵaýshy Halida Ájiǵulova Dalanews.kz agenttigine máseleniń jai-japsaryn málimdegen bolatyn.
Advokat “ministrlik qatesin moiyndamai, zańnamany buza otyryp, TJ kvotasyn óz betinshe engizýge quqyly bolǵandai keiip tanytýda” dep úndeý jasady.
“Ministrlik óz granttarynan zańsyz aiyrylǵan talapkerlerdi únemi elemei qala almaidy. Sý tasqynynan zardap shekkender túlekterge kómektesý maqsatynda jyldar boiy grantqa qol jetkizý úshin tynbai daiyndalǵan basqa balalardyń quqyqtaryn shektei almaimyz. Basqa bireýdiń esebinen qaiyrymdylyq jasaýǵa bolmaidy.
Ókinishke qarai, biyl keibir túlekter ýniversitetke bara almaidy, sebebi oqý oryndary UBT-dan joǵary ball alǵanyna qaramastan olarǵa ishki granttardy berýden bas tartqan. Al olardyń otbasylary oqý aqysyn tóleý shamalary jetpeitinin aityp otyr”, — dedi advokat.
Ol bul iske bei-jai qaramaityndardan qoldaý surady. Advokat granttan qaǵylǵandar sotta quqyǵyn qorǵaǵanǵa deiin olardyń oqý aqysyn tóleýge kómektesetin jandar tabylsa degen tilegin bildirdi.
Halida Ájiǵulovaǵa 200-den astam bala júgingen, olar endi óz quqyqtaryn ulttyq jáne halyqaralyq organdarda qorǵaý úshin kásibi bilim alýǵa májbúr.
“Ǵylym ministrliginiń ádiletsizdigine kóngisi kelmeitin túlekterge tántimin. Barlyq BAQ pen ar-namysty azamattardy balalardy qoldaýdy jalǵastyrýǵa shaqyramyn. Is sot qaraýyna túsken boida mindetti túrde habarlaimyz. Áli ondaǵan talap-aryzdar qaralýǵa daiyndalýda. Balalar óz quqyqtary úshin kúresýge belsendi túrde kirisip, ádilettilikke jetkenshe toqtamaidy. Al biz, ar-namysty eresekter, olardy qoldaýymyz qajet. Men mindetti túrde qoldaimyn.
Tómengi palata depýtattaryna alǵysymdy bildiremin, olar da ministrliktiń zań shyǵarýshy fýnktsiialaryn ózine menshiktep alýyna narazylyq bildirdi. Bas prokýratýra qyzmetkerlerine de alǵysymdy bildiremin, olar da Ǵylym ministrliginiń TJ kvotasyn engizý áreketterinde zań buzýshylyqtaryn kórip, muny tekserýge ýáde berdi. Ádilettilik ornaýy tiis!” — dedi advokat.
