Abai oblysynda shahtadaǵy jarylystan aýyr jaraqat alǵan jumysshyǵa moraldyq ziian úshin 4 mln teńge ótemaqy óndirildi, dep habarlaidy dalanews.kz.
Abai oblysy Jarma aýdandyq soty óndiristegi jazataiym oqiǵadan zardap shekken jumysshynyń jumys berýshige qarsy talap aryzyn qaraǵan.
Sot materialdaryna sáikes, er adam 2021 jyldan beri taý-ken jumysshysy bolyp eńbek etken. 2024 jylǵy shildede kenish aýmaǵyndaǵy jarylǵysh zattar qoimasynda jerasty jarylysy bolǵan. Jarylys tolqyny saldarynan jumysshy aýyr jaraqat alǵan.
Arnaiy tergeý barysynda oqiǵaǵa jumys berýshiniń 100% kináli ekeni, al jumysshynyń kinási bolmaǵany anyqtalǵan. Sot saraptamasy onyń densaýlyǵyna keltirilgen ziiandy aýyr jaraqat retinde baǵalaǵan.
Keiin meditsinalyq-áleýmettik saraptama er adamǵa úshinshi toptaǵy múgedektik belgiledi.
Jumys berýshi talap aryzdy moiyndamaǵan. Kompaniia ókili densaýlyqqa keltirilgen ziianǵa bailanysty tólemderdi saqtandyrý kompaniiasy júzege asyratynyn aityp, jaýapkershilik seriktestikke emes, kásiporynnyń naqty bir qyzmetkerine júktelýi kerek dep eseptegen.
Alaida sot jumysshynyń moraldyq ziiandy óteý týraly talabyn qanaǵattandyryp, jumys berýshiden 4 mln teńge óndirdi. Sonymen qatar memlekettik baj tóleýge ketken shyǵyndy óteý mindetteldi.
Materialdyq shyǵyndy óteý týraly talaptyń qalǵan bóligi qanaǵattandyrylmady. Sot usynylǵan qujattarda kórsetilgen shyǵyndardyń óndiristik jaraqat saldaryn emdeýge tikelei bailanysty ekeni dáleldenbegenin atap ótti.
