Túrkistan oblysy, Saýran aýdanynda ulttyq sport túrlerinen saıys ótti. «Sálem saǵan, Túrkistan!» atty festıvál aıasynda ótken jarysqa Saýran, Otyrar aýdandary men Túrkistan, Kentaý qalalarynyń sportshylary qatysty. Jarystyń ashylý saltanatynda Túrkistan oblysy ákiminiń orynbasary Sáken Qalqamanov sóz sóılep, jurtshylyqty quttyqtady. Óńirde ulttyq sport túrleri qarqyndy damyp kele jaqanyna toqtalyp, bul baǵyttaǵy jumystar jalǵasatynyn jetkizdi, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Tarıhı Saýran qalashyǵy mańynda ótken festıválde kókpar, teńge ilý, qyz qýý, jamby atý jáne láńgi tebýden júldeler sarapqa salyndy. Sonymen birge qusbegiler men tazy baptaýshylar da jurtshylyqqa kóne dástúrden syr shertti. Qyrany qalyqtap, tazysy oqtaı zýlaǵan túrkistandyqtar óńirde tól mádenıetimizdi jalǵastyrýshylar bar ekenin ańǵartty.

Joǵary deńgeıde ótken bul mádenıet jáne óner festıvaline Túrkistan oblysynyń ákimdigi men oblystyq dene shynyqtyrý jáne sport basqarmasy, Saýran jáne Otyrar aýdandarynyń ákimdikteri at salysty.

Jarys jolyna shyqqan Saýran, Otyrar aýdandary men Túrkistan men Kentaý qalalarynyń talantty sportshylary kórermenniń delebesin qozdyryp, ulttyq sport túrleri boıynsha sheberlikterin kórsetti. Kókparshylar myqtylyǵyn pash etse, mergender jambyny dál kózdep, jurtshylyqty tańǵaldyrdy.

Búginde Túrkistan oblysynda týrızm salasy qanatyn keńge jaıyp keledi. Bul rette sheteldik jáne otandyq saıahatshylarǵa tarıhı eskertkishter men tabıǵatty kórsetýmen qatar ulttyq bolmysymyzdy, mádenıetimizdi dáripteıtin is-sharalar uıymdastyrylyp turýy tıis. Osy maqsatty kózdegen Saýran tórindegi ulttyq sport saıysy óńirdiń týrızmdegi jáne sporttaǵy zor áleýetin baıqatty.