تۇركىستان وبلىسى، ساۋران اۋدانىندا ۇلتتىق سپورت تۇرلەرىنەن سايىس ءوتتى. «سالەم ساعان، تۇركىستان!» اتتى فەستيۆال اياسىندا وتكەن جارىسقا ساۋران، وتىرار اۋداندارى مەن تۇركىستان، كەنتاۋ قالالارىنىڭ سپورتشىلارى قاتىستى. جارىستىڭ اشىلۋ سالتاناتىندا تۇركىستان وبلىسى اكىمىنىڭ ورىنباسارى ساكەن قالقامانوۆ ءسوز سويلەپ، جۇرتشىلىقتى قۇتتىقتادى. وڭىردە ۇلتتىق سپورت تۇرلەرى قارقىندى دامىپ كەلە جاقانىنا توقتالىپ، بۇل باعىتتاعى جۇمىستار جالعاساتىنىن جەتكىزدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

تاريحي ساۋران قالاشىعى ماڭىندا وتكەن فەستيۆالدە كوكپار، تەڭگە ءىلۋ، قىز قۋۋ، جامبى اتۋ جانە لاڭگى تەبۋدەن جۇلدەلەر ساراپقا سالىندى. سونىمەن بىرگە قۇسبەگىلەر مەن تازى باپتاۋشىلار دا جۇرتشىلىققا كونە داستۇردەن سىر شەرتتى. قىرانى قالىقتاپ، تازىسى وقتاي زۋلاعان تۇركىستاندىقتار وڭىردە ءتول مادەنيەتىمىزدى جالعاستىرۋشىلار بار ەكەنىن اڭعارتتى.

جوعارى دەڭگەيدە وتكەن بۇل مادەنيەت جانە ونەر فەستيۆالىنە تۇركىستان وبلىسىنىڭ اكىمدىگى مەن وبلىستىق دەنە شىنىقتىرۋ جانە سپورت باسقارماسى، ساۋران جانە وتىرار اۋداندارىنىڭ اكىمدىكتەرى ات سالىستى.

جارىس جولىنا شىققان ساۋران، وتىرار اۋداندارى مەن تۇركىستان مەن كەنتاۋ قالالارىنىڭ تالانتتى سپورتشىلارى كورەرمەننىڭ دەلەبەسىن قوزدىرىپ، ۇلتتىق سپورت تۇرلەرى بويىنشا شەبەرلىكتەرىن كورسەتتى. كوكپارشىلار مىقتىلىعىن پاش ەتسە، مەرگەندەر جامبىنى ءدال كوزدەپ، جۇرتشىلىقتى تاڭعالدىردى.

بۇگىندە تۇركىستان وبلىسىندا تۋريزم سالاسى قاناتىن كەڭگە جايىپ كەلەدى. بۇل رەتتە شەتەلدىك جانە وتاندىق ساياحاتشىلارعا تاريحي ەسكەرتكىشتەر مەن تابيعاتتى كورسەتۋمەن قاتار ۇلتتىق بولمىسىمىزدى، مادەنيەتىمىزدى دارىپتەيتىن ءىس-شارالار ۇيىمداستىرىلىپ تۇرۋى ءتيىس. وسى ماقساتتى كوزدەگەن ساۋران تورىندەگى ۇلتتىق سپورت سايىسى ءوڭىردىڭ تۋريزمدەگى جانە سپورتتاعى زور الەۋەتىن بايقاتتى.