Saýran aýdanynda 25 qazan – Respýblıka kúni ulttyq merekesine oraı, «Sport – densaýlyq kepili» atty marafon uıymdastyryldy, – dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.

Saıys aýyldyq okrýg turǵyndary arasynda 3 shaqyrym qashyqtyqqa júgirýden ótti. Marafonǵa aýdannan 800-ge tarta azamat qatysyp, óz belsendilikterin kórsetti.

Saýran aýdanynda alǵash ret uıymdastyrylyp jatqan sharaǵa aýdan ákimi Ǵanı Rysbekov qatysyp, jarysqa qatysýshylardy kele jatqan Respýblıka kúnimen quttyqtady.

Marafonda ózgelerden ozyq kelgender marapattalyp, qarjylaı syılyqtar aldy. Atap aıtqanda, áıelder arasynda 1-oryndy Nargıza Alısherova ıemdense, júldeli ekinshi jáne úshinshi oryndardy Gýllola Sadyqova men Ýmsın Mýslımova ózara bólisti. Al, erler arasynda Serik Ismaılov jeńimpaz atansa, 2-oryndy Rýslan Tashpolatov, 3-oryndy Zakır Amanbaı aldy. Ózge de qatysýshylarǵa alǵys hattar men medaldar tabystaldy.