Qazaqstannyń 2025 jylǵy syrtqy saýda kórsetkishteri qurylymdyq álsireý belgilerin kórsetti, dep habarlaıdy Dala News.

Jyl qorytyndysy boıynsha ımport kólemi 64,8 mlrd dollardy qurap (+4,4 mlrd), al eksport 79,0 mlrd dollarǵa deıin tómendedi (-2,6 mlrd). Nátıjesinde syrtqy saýdanyń oń saldosy úshten birine qysqaryp, 14,2 mlrd dollarǵa deıin azaıdy. Bul eksport sektorynyń JİÓ ósimine qosatyn úlesiniń álsiregenin bildiredi.

Saýda balansynyń profısıti JİÓ-ge shaqqanda 4,6%-ǵa deıin tómendedi. Bir jyl buryn bul kórsetkish 7,3% bolǵan. Sarapshylardyń baǵalaýynsha, ekonomıkalyq ósim qurylymy birtindep ishki suranys pen ınvestısıalarǵa aýysyp jatyr, al syrtqy sektordyń róli tómendeýde.

Mamandardyń pikirinshe, eksporttyń shıkizatqa táýeldiligi jáne keıbir salalardyń ımportqa joǵary táýeldi bolýy ekonomıkaǵa syrtqy baǵa jáne valúta baǵamy shoktarynyń áserin kúsheıtedi. Sondyqtan eksportty ártaraptandyrý men ımportqa táýeldilikti azaıtý uzaqmerzimdi turaqty ósimniń negizgi shartyna aınalyp otyr.

Úkimet boljamyna sáıkes, 2026 jyly eksport 77,1 mlrd dollarǵa deıin tómendeýi múmkin, al ımport 67,7 mlrd dollarǵa deıin ósedi. Bul jaǵdaıda saýda balansynyń profısıti 9,4 mlrd dollarǵa deıin qysqaryp, taǵy da shamamen úshten birine azaıýy yqtımal.

Mundaı dınamıka syrtqy pozısıanyń álsireýin, valúta naryǵyna qysymnyń kúsheıýin jáne qolaısyz syrtqy konúnktýra jaǵdaıynda Ulttyq banktiń halyqaralyq rezervterine júktemeniń artý qaýpin bildiredi.