Nazarbaevtyń nemere inisi zańsyz jolmen "Qazaqtelekomnan" 12,7 mlrd teńge, "Qazaqstan temirjoly" kompaniiasyna tiesili "Kóliktik servis ortalyǵynan" 28,6 mlrd teńge jymqyrǵan dep aiyptalǵan.
Sotta Satybaldynyń ózi eshteńe aitqan joq, onyń aiybyn moiyndaǵanyn jábirlenýshi taraptyń advokattary jetkizdi.
Osydan soń sýdia Nurlan Baiahmetov prokýror Jangeldi Esebaevqa mediatsiialyq kelisim boiynsha jedel sheshim shyǵarýdy surady. Prokýror sýdiadan sheshim qabyldaýǵa ýaqyt surap, sotta úzilis jariialandy.
Sot otyrysyna Qairat Satybaldynyń týǵan inisi, UQK tóraǵasynyń burynǵy orynbasary Samat Ábish pen balalary onlain qosyldy. Bul – Samat Ábishtiń Qańtar oqiǵasynan beri alǵash kórinýi.
Sot basynda Qairat Satybaldy Samat Ábishpen, balalarmen amandasyp jaǵdai surasty.
Samat Ábish aǵasyna "álhamdýlilla, Qudaiǵa shúkir, amal jasap júrmin" dedi. Keiin Satybaldy ulyna "Samat aǵańnyń janynda bol, balam, onymen aqyldas jaqsy ma?" dedi. Al uly ákesine saǵynǵanyn jetkizdi.
Sot protsesi bastalǵanda sýdia video-foto túsirýge tyiym saldy. Azattyqta jariialanǵan foto men videolardyń bári sot protsesi bastalmai turyp túsirilgen.
Eks-prezident Nursultan Nazarbaevtyń nemere inisi Qairat Satybaldy naýryzda qamaýǵa alynǵan edi. Onyń ústinen "aldaý jolymen múliktik zalal keltirdi", "senip tapsyrylǵan bóten múlikti iemdenip alý nemese talan-tarajǵa saldy" degen aiyppen qylmystyq is qozǵalǵan.
Budan bólek Satybaldy "salyqtan jáne kedendik tólemderden jaltardy", "qylmystyq jolmen tapqan tabysyn zańdastyrdy" degen kúdikpen de tergelip jatyr. Ol Forbes Kazakhstan esebi boiynsha Qazaqstandaǵy eń yqpaldy biznesmenderdiń tizimine kirgen. Onyń áieli Gúlmira Satybaldy da "biznesti reiderlik jolmen tartyp aldy" degen aiyppen qamaýǵa alynǵan.
Al Qairat Satybaldynyń inisi Samat Ábish Qańtar qyrǵynynan keiin UQK tóraǵasynyń orynbasary qyzmetinen bosatylǵan edi. UQK Samat Ábish "tergeý nazarynda" ekenin málimdegen.
Qairat Satybaldy men Samat Ábish – Nursultan Nazarbaevtyń baýyry Satybaldy Nazarbaevtyń (1947-1981) balalary.
Sarapshylar Qańtar oqiǵasynan soń eks-prezident týystarynyń qamaýǵa alynyp, otbasy músheleriniń joǵary laýazymdardan shettetilgenin burynǵy klannyń álsiregeni retinde baǵalaidy.
https://dalanews.kz/del-qazir/81431-putin-ne-isterin-bilmey-alasuruda-r
