Saryaǵash aýdanyn elektr qýatymen turaqty jáne úzdiksiz qamtityn qosalqy stantsiia jańǵyrtýdan ótkizilip, paidalanýǵa berildi.
Bul stantsiia atalǵan ólkedegi áleýmettik mańyzy basym nysandardy da qosa qamtamasyz etedi. «Ońtústik Jaryq Tranzit» JShS-i óziniń investitsiialyq baǵdarlamasy aiasynda jańǵyrtý jumysyn júrgizip, aýdandaǵy alpaýyt qosalqy stantsiiany jańartty.
Poltoratskii qosalqy stantsiiasy ótken ǵasyrdyń 70-shi jyldary halyqtyń igiligine berilgen eken. Sodan bul nysan 40 jyldan asa toqtaýsyz jumys istep turdy. Al biyl «Ońtústik Jaryq Tranzit» JShS-i óziniń investitsiialyq baǵdarlamasy aiasynda stantsiiada jańǵyrtý jumysyn júrgizip, jabdyqtaryn jańartty.
Serik Turǵymbaev, «Ońtústik Jaryq Tranzit» JShS-i ortalyq dispetcherlik qyzmetiniń basshysy: “Poltoratskii qosalqy stantsiiasy Shardara GES AQ jáne 3-shi “Energoortalyq” AQ elektr energiia kózderi arasyndaǵy qýattyń tranzittik aǵynyna qatysatyn toraptyq qosalqy stantsiia bolyp tabylady. Ol Saryaǵash aýdanynyń tutynýshylaryn elektr qýatymen qamtamasyz etýge arnalǵan”.
Munda tozyǵy jetken maily ajyratqyshtardyń ornyna qazirgi zamanaýi elegazdy ajyratqyshtar, jańa transformatorlar ornatylǵan. Bul elektr qýatyn taratýda sapany arttyratyny sózsiz.
Serik Turǵymbaev, «Ońtústik Jaryq Tranzit» JShS-i ortalyq dispetcherlik qyzmetiniń basshysy: “Saryaǵash aýdanyndaǵy Poltoratskii qosalqy stantsiiasynda MMO -110 kV tipti tozǵan jáne eskirgen mai ajyratqyshtarynyń 3 danasyn VGP -110 kV elegazdy ajyratqyshtaryna aýystyrý, T-4 transformatorynyń VT-35 tipti tozǵan mai ajyratqyshyn VB-35 elegazdy ajyratqyshyna aýystyrý, 35 kV elektr jelilerindegi tutynýshylardy elektrmen jabdyqtaý sulbalarynyń senimdiligin arttyrý boiynsha jáne “Intergaz Ortalyq Aziia” AQ tutynýshylaryn 6 kV elektrmen jabdyqtaý shemasynyń senimdiligin arttyrý boiynsha is-sharalar oryndaldy”.
Budan bólek, jabyq taratý qurylǵylar men reaktorlar, relelik qorǵanys jáne avtomatika jabdyqtary da jańartyldy. Aita ketý kerek, qosalqy stantsiia 20 myńǵa jýyq jeke tulǵa men 800-ge jýyq zańdy tulǵalardy qýatpen qamtamasyz etedi.
Onyń ishinde alyp gaz qoimasy, keden, shekara beketteri siiaqty mańyzdy nysandar bar. Demek, aýdandaǵy tutynýshylardyń teń jartysy jańartylyp paidalanýǵa berilgen osy qosalqy stantsiiadan sapaly qýat alady degen sóz.
