Saryaǵash aýdanynda táýligine 3 mln 200 000 myń dana saǵyz, 3 000 keli shokolad, 165 000 dana chýpa-chýps shyǵarylady. Óndiris ornynda 100-den asa adamdy jergilikti turǵyn turaqty jumyspen qamtyǵan. «Fresboom» JSHS-i  28 túrli kondıterlik ónim shyǵaryp jatyr. Munda óndirilgen táttiler qazirgi tańda kórshi Reseı memleketi men elimizdiń barlyq oblys, qalalaryna jetkizilýde.

Túrkistan oblysynyń ákimi Darhan Satybaldynyń ákimderge qoıar talaptarynyń biri – halyqtyń ál-aýqatyn arttyrý, óndiris oryndaryn ashyp, jumys oryndaryn kóbeıtý. Bul baǵyttaǵy jumystarǵa kúsh salyndy.

Aýdan ákimi Arman Abdýllaev Qurkeles aýyldyq okrýginde ornalasqan «Fresboom» JSHS-niń  kondıterlik ónimder óndiretin kásiporynda bolyp, kásipkerlermen kezdesti.

Atalǵan kásiporyn 2020 jyldyń qorytyndysy boıynsha aýdannyń áleýmettik-ekonomıkalyq damýyna qosqan erekshe úlesi úshin «Jyldyń úzdik kásiporyny» nomınasıasymen marapattalǵan.

Saryaǵash aýdanyndaǵy jylyjaılardy, aýyl sharýashylyǵy óniminiń kólemin eskere otyryp, jemis-jıdek ónimderin keptirý, kókónisterdi qaıta óńdeý baǵytyn damytý qolǵa alyndy.

Osyny eskere otyryp, «Damdes Agro» qazaqstandyq kompanıa qytaılyq kompanıamen (GUAN-FANG Food Machinery) kelisim jasap, jalpy quny 4,6 mlrd teńgeni quraıtyn jobalardy iske asyrýdy josparlap otyr.

Ol jerde kókónis muzdatqysh (shokovaıa zamorozka), jemis-jıdek ónimderin keptirý, kókónisterdi qaıta óńdeý jáne oraý materıaldaryn (ýpakovka) shyǵarý sehtary ashylatyn bolady. 50 adam jumyspen qamtylady.

Oblysta bıznesti qoldaý úshin túrli memlekettik baǵdarlamalar júzege asyrylyp, qajetti sharalar qabyldanýda. Osy qoldaýlardy tıimdi paıdalanyp, óndiristi keńeıtip jáne jańa óndiris oshaqtaryn ashý baǵyty boıynsha jumystar qarqyndy júrgizilip jatyr.

Aýdanda shaǵyn jáne orta bıznes sany 20 myńnan asty. Olarmen óndirilgen ónim kólemi byltyr 87 mlrd. teńgeni qurady. Bıyl Saryaǵash aýdanynda qosymsha 3,2 myń jańa shaǵyn jáne orta bıznes sýbektisi tirkeldi.