سارىاعاش اۋدانىندا تاۋلىگىنە 3 ملن 200 000 مىڭ دانا ساعىز، 3 000 كەلى شوكولاد، 165 000 دانا چۋپا-چۋپس شىعارىلادى. ءوندىرىس ورنىندا 100-دەن اسا ادامدى جەرگىلىكتى تۇرعىن تۇراقتى جۇمىسپەن قامتىعان. «Fresboom» ءجشس-ى  28 ءتۇرلى كونديتەرلىك ءونىم شىعارىپ جاتىر. مۇندا وندىرىلگەن تاتتىلەر قازىرگى تاڭدا كورشى رەسەي مەملەكەتى مەن ەلىمىزدىڭ بارلىق وبلىس، قالالارىنا جەتكىزىلۋدە.

تۇركىستان وبلىسىنىڭ اكىمى دارحان ساتىبالدىنىڭ اكىمدەرگە قويار تالاپتارىنىڭ ءبىرى – حالىقتىڭ ءال-اۋقاتىن ارتتىرۋ، ءوندىرىس ورىندارىن اشىپ، جۇمىس ورىندارىن كوبەيتۋ. بۇل باعىتتاعى جۇمىستارعا كۇش سالىندى.

اۋدان اكىمى ارمان ابدۋللايەۆ قۇركەلەس اۋىلدىق وكرۋگىندە ورنالاسقان «Fresboom» ءجشس-نىڭ  كونديتەرلىك ونىمدەر وندىرەتىن كاسىپورىندا بولىپ، كاسىپكەرلەرمەن كەزدەستى.

اتالعان كاسىپورىن 2020 جىلدىڭ قورىتىندىسى بويىنشا اۋداننىڭ الەۋمەتتىك-ەكونوميكالىق دامۋىنا قوسقان ەرەكشە ۇلەسى ءۇشىن «جىلدىڭ ۇزدىك كاسىپورىنى» نوميناسياسىمەن ماراپاتتالعان.

سارىاعاش اۋدانىنداعى جىلىجايلاردى، اۋىل شارۋاشىلىعى ءونىمىنىڭ كولەمىن ەسكەرە وتىرىپ، جەمىس-جيدەك ونىمدەرىن كەپتىرۋ، كوكونىستەردى قايتا وڭدەۋ باعىتىن دامىتۋ قولعا الىندى.

وسىنى ەسكەرە وتىرىپ، «Damdes Agro» قازاقستاندىق كومپانيا قىتايلىق كومپانيامەن (GUAN-FANG Food Machinery) كەلىسىم جاساپ، جالپى قۇنى 4،6 ملرد تەڭگەنى قۇرايتىن جوبالاردى ىسكە اسىرۋدى جوسپارلاپ وتىر.

ول جەردە كوكونىس مۇزداتقىش (شوكوۆايا زاموروزكا)، جەمىس-جيدەك ونىمدەرىن كەپتىرۋ، كوكونىستەردى قايتا وڭدەۋ جانە وراۋ ماتەريالدارىن (ۋپاكوۆكا) شىعارۋ سەحتارى اشىلاتىن بولادى. 50 ادام جۇمىسپەن قامتىلادى.

وبلىستا بيزنەستى قولداۋ ءۇشىن ءتۇرلى مەملەكەتتىك باعدارلامالار جۇزەگە اسىرىلىپ، قاجەتتى شارالار قابىلدانۋدا. وسى قولداۋلاردى ءتيىمدى پايدالانىپ، ءوندىرىستى كەڭەيتىپ جانە جاڭا ءوندىرىس وشاقتارىن اشۋ باعىتى بويىنشا جۇمىستار قارقىندى جۇرگىزىلىپ جاتىر.

اۋداندا شاعىن جانە ورتا بيزنەس سانى 20 مىڭنان استى. ولارمەن وندىرىلگەن ءونىم كولەمى بىلتىر 87 ملرد. تەڭگەنى قۇرادى. بيىل سارىاعاش اۋدانىندا قوسىمشا 3،2 مىڭ جاڭا شاعىن جانە ورتا بيزنەس سۋبەكتىسى تىركەلدى.