Qazaqstan Qarýly Kúshterinde merzimdi áskeri qyzmetshiler men olardyń otbasylaryna arnalǵan keri bailanys júiesi jolǵa qoiylǵan, dep habarlaidy Dalanews.kz.
Jasandy intellektke negizdelgen AiSulu Telegram-boty men Armykz servisi arqyly Qorǵanys ministrligine 11 700-den astam ótinish tústi. Áskeri bólimderdiń baqylaý-ótkizý pýnktterinde ornalastyrylǵan «Ashyq armiia» QR-kodtary keri bailanys formalaryna jedel ótýge jáne Telegram arqyly, sonyń ishinde anonimdi túrde habarlama jiberýge múmkindik beredi. Barlyq ótinishterdi Qorǵanys ministrliginiń tárbie jáne ideologiialyq jumys departamenti taldaidy.
Armykz platformasynda áskeri qyzmet máseleleri boiynsha keńes beretin jasandy intellekt negizindegi keńesshi jumys isteidi. 2025 jyldan beri ol 11 000-nan astam saýalǵa jaýap berdi. Sonymen qatar bólimshelerde qolbasshylyqtyń, áskeri prokýratýranyń jáne áskeri politsiianyń bailanys nómirleri ornalastyrylǵan.
«Bizdiń maqsatymyz – másele ýshyǵyp ketpei turyp, sarbazdyń únin estý. Árbir ótinish – mindetti túrde jaýap berýdi talap etetin signal», – dedi Qorǵanys ministrligi tárbie jáne ideologiialyq jumys departamenti psihologiia jáne áskeri-áleýmettik jumys basqarmasynyń bastyǵy podpolkovnik Arman Qalyshev.
AiSulu Telegram-boty iske qosylǵaly beri áskeri qyzmetshiler men olardyń jaqyndarynan 700-den astam ótinish qabyldady. Sondai-aq sarbazdar demalys jáne mereke kúnderi «Otbasymen beineqońyraý» arqyly jaqyndarymen bailanys ornata alady. Árbir áskeri bólimde bólimshe komandirleri sarbazdar ata-analaryna arnalǵan WhatsApp chattaryn quryp, qyzmet barysy týraly aqparat berip, suraqtarǵa jaýap beredi.
Qazirgi zamanǵy bailanys quraldary áskeri qyzmetshilerdiń moraldyq-psihologiialyq jaǵdaiyn nyǵaitýǵa, janjaldardyń aldyn alýǵa jáne komandirler, sarbazdar men ata-analar arasyndaǵy senimdi arttyrýǵa múmkindik beredi.
