قازاقستان قارۋلى كۇشتەرىندە مەرزىمدى اسكەري قىزمەتشىلەر مەن ولاردىڭ وتباسىلارىنا ارنالعان كەرى بايلانىس جۇيەسى جولعا قويىلعان، دەپ حابارلايدى Dalanews.kz.
جاساندى ينتەللەكتكە نەگىزدەلگەن AiSulu Telegram-بوتى مەن Armykz سەرۆيسى ارقىلى قورعانىس مينيسترلىگىنە 11 700-دەن استام ءوتىنىش ءتۇستى. اسكەري بولىمدەردىڭ باقىلاۋ-وتكىزۋ پۋنكتتەرىندە ورنالاستىرىلعان «اشىق ارميا» QR-كودتارى كەرى بايلانىس فورمالارىنا جەدەل وتۋگە جانە Telegram ارقىلى، سونىڭ ىشىندە ءانونيمدى تۇردە حابارلاما جىبەرۋگە مۇمكىندىك بەرەدى. بارلىق وتىنىشتەردى قورعانىس مينيسترلىگىنىڭ تاربيە جانە يدەولوگيالىق جۇمىس دەپارتامەنتى تالدايدى.
Armykz پلاتفورماسىندا اسكەري قىزمەت ماسەلەلەرى بويىنشا كەڭەس بەرەتىن جاساندى ينتەللەكت نەگىزىندەگى كەڭەسشى جۇمىس ىستەيدى. 2025 جىلدان بەرى ول 11 000-نان استام ساۋالعا جاۋاپ بەردى. سونىمەن قاتار بولىمشەلەردە قولباسشىلىقتىڭ، اسكەري پروكۋراتۋرانىڭ جانە اسكەري پوليسيانىڭ بايلانىس نومىرلەرى ورنالاستىرىلعان.
«ءبىزدىڭ ماقساتىمىز – ماسەلە ۋشىعىپ كەتپەي تۇرىپ، ساربازدىڭ ءۇنىن ەستۋ. ءاربىر ءوتىنىش – مىندەتتى تۇردە جاۋاپ بەرۋدى تالاپ ەتەتىن سيگنال»، – دەدى قورعانىس مينيسترلىگى تاربيە جانە يدەولوگيالىق جۇمىس دەپارتامەنتى پسيحولوگيا جانە اسكەري-الەۋمەتتىك جۇمىس باسقارماسىنىڭ باستىعى پودپولكوۆنيك ارمان قالىشيەۆ.
AiSulu Telegram-بوتى ىسكە قوسىلعالى بەرى اسكەري قىزمەتشىلەر مەن ولاردىڭ جاقىندارىنان 700-دەن استام ءوتىنىش قابىلدادى. سونداي-اق ساربازدار دەمالىس جانە مەرەكە كۇندەرى «وتباسىمەن بەينەقوڭىراۋ» ارقىلى جاقىندارىمەن بايلانىس ورناتا الادى. ءاربىر اسكەري بولىمدە بولىمشە كومانديرلەرى ساربازدار اتا-انالارىنا ارنالعان WhatsApp چاتتارىن قۇرىپ، قىزمەت بارىسى تۋرالى اقپارات بەرىپ، سۇراقتارعا جاۋاپ بەرەدى.
قازىرگى زامانعى بايلانىس قۇرالدارى اسكەري قىزمەتشىلەردىڭ مورالدىق-پسيحولوگيالىق جاعدايىن نىعايتۋعا، جانجالداردىڭ الدىن الۋعا جانە كومانديرلەر، ساربازدار مەن اتا-انالار اراسىنداعى سەنىمدى ارتتىرۋعا مۇمكىندىك بەرەدى.
