Vızalyq jeńildikter 30 kúnge deıingi merzimmen shektelgen. Ony tek saıahat, iskerlik sıaqty jeke maqsattaǵy saparlar úshin paıdalanýǵa bolady. Bul kelisimmen qatar eki el arasynda aqparat almasýǵa baılanysty ýaǵdalastyq ta kúshine enedi.
Jalpy, Qytaımen jasalǵan kelisim negizinde endi Qazaqstan azamattary 34 memleketke vızasyz saparlaýǵa múmkindik aldy.
Azamattardyń vızasyz saıahattaý quqyǵy – memlekettiń turaqty damýy men elaralyq dıplomatıadaǵy jetistiginiń bir kórinisi. Mysaly, Japonıa azamattary 142 elge belgili bir merzimge vızasyz saıahattaı alady. Ulybrıtanıa azamattary 144 elge, AQSH azamattary 186 elge vızasyz kirýge quqyly. Al Qytaı azamattary úshin 32 elde vızasyz talaptar jeńildetilgen.
Qazaqstan úshin halyqaralyq qaýymdastyqta barlyq eldermen teń dárejede seriktestikti saqtaý asa mańyzdy. Vızasyz júıe týraly dál osyndaı kelisimdi jasaý týraly kelissóz Eýropa elderimen de júrgizilip jatyr, biraq bul elder tarapynan ázirge naqty sheshim qabyldanǵan joq.
Eń bastysy, eki el arasyndaǵy vızasyz júıe týraly kelisimdi Qazaqstan da, Qytaı da kez kelgen ýaqytta ýaqytsha toqtatýǵa nemese kúshin joıýǵa qaqyly. Naqtyraq aıtqanda, Kelisimniń 8-babynda kórsetilgendeı, eki taraptyń kez kelgeni ulttyq qaýipsizdikti, qoǵamdyq tártip nemese densaýlyq saqtaýdy qamtamasyz etý maqsatynda bul Kelisimdi ýaqytsha toqtatýǵa, ishinara nemese tolyqtaı toqtatýǵa quqyly.
Bul kelisimge Qazaqstan Prezıdenti Qasym-Jomart Toqaevtyń bıylǵy jyldyń 18 mamyrynda Qytaı Halyq Respýblıkasyna jasaǵan issapary barysynda qol qoıylǵan bolatyn.
Jaqsybek Jıenalıev, Qazaqstandyq qoǵamdyq damý ınstıtýtynyń sarapshysy
