BAQ-ta Sara Nazarbaeva qaıtys boldy degen aqparat tarady. Bul týraly Orda.kz jazdy, dep habarlaıdy Dalanews.kz.
Ázirge aqparat resmı túrde rastalǵan joq.
Aıta keteıik, buǵan deıin Sara Nazarbaeva Prezıdent İs basqarmasy Medısınalyq ortalyǵynyń Ulttyq gospıtalinde emdelip jatqany aıtyldy.
Sara Nazarbaeva týraly ne belgili?
Sara Alpysqyzy Nazarbaeva (qazirgi tegi – Qonaqaeva) - Qazaqstannyń tuńǵysh prezıdenti Nursultan Nazarbaevtyń jubaıy, qoǵam qaıratkeri. Ol 1941 jyly Qaraǵandy oblysynda dúnıege kelgen. Joǵary bilim alyp, ınjener-metallýrg mamandyǵy boıynsha eńbek etken.
1962 jyly Nursultan Nazarbaevpen otaý qurǵan. Erli-zaıyptynyń úsh qyzy bar: Darıǵa, Dınara jáne Álıa.
Sara Alpysqyzy biraz ýaqyttan beri qoǵamdyq ómirge sırek aralasyp, saıası sahnadan tys qaldy. Ol kópshilik aldynda jıi kórinbeı ketti.
1992 jyly ol "Bóbek" halyqaralyq balalar qaıyrymdylyq qoryn qurdy. Bul qordyń maqsaty – jetim, múmkindigi shekteýli jáne áleýmettik turǵyda osal toptaǵy balalarǵa jan-jaqty kómek kórsetý. Sonymen qatar, onyń bastamasymen elimizdegi mektepterde "Ózin-ózi taný" páni engizildi. Keıin bul pán oqý baǵdarlamasynan alyp tastaldy. Sara Alpysqyzynyń bastamasymen Qazaqstanda "SOS – balalar aýyldary" halyqaralyq jobasy iske asty.
Keıingi jyldary ol burynǵy tegin ózgertip, qyz kezindegi tegi Qonaqaevany qaıta alǵany belgili boldy.
Oǵan qosa biraz jyldan beri Saranyń ózine qaraǵanda qyzdary jıi jurt nazarynda boldy. Tipti byltyr Sara Nazarbaeva qaıtys bolǵany týraly aqparat tarady. Keıinirek tuńǵysh prezıdent Nursultan Nazarbaevtyń keńesshisi ári baspasóz hatshysy Aıdos Úkibaı bul aqparat shyndyqqa janaspaıtynyn málimdedi.
