Ótken jumada BAQ pen áleýmettik jelilerde Qaraǵandyda boksshy Serik Sápıev soqqyǵa jyǵyldy degen aqparat tarady, dep habarlaıdy Dalanews.kz.

Bul jaǵdaıǵa Qaraǵandy oblysy ákiminiń baspasóz qyzmeti pikir bildirdi.

"Oqıǵanyń mán-jaıyn jan-jaqty ári ádil zerdeleý maqsatynda Sport basqarmasynda Memlekettik qyzmet isteri agenttiginiń tıisti departamenti tarapynan tekseris bastaldy. Sonymen qatar, basqarmanyń qyzmetine keshendi aýdıt júrgizý kózdelip otyr", - dep jazylǵan habarlamada.

Aıta keteıik, buǵan deıin Qaraǵandy qalasynyń 42 jastaǵy turǵynynyń aryzy negizinde uryp-soǵý deregi boıynsha qylmystyq is qozǵalǵan edi.

"21 qańtarda qaladaǵy sport keshenderiniń birinde eki er adam arasynda janjal týyndaǵan. Qazir polısıa qyzmetkerleri bolǵan oqıǵanyń barlyq mán-jaıyn anyqtap jatyr", - dedi Qaraǵandy oblysy Polısıa departamentiniń baspasóz qyzmeti ókili.