Taldyqorǵan qalasynda sapasyz jasalǵan aýlany merdiger kompanıa óz qarajatyna qaıta jasaıtyn boldy. «Ǵaryshker» shaǵyn aýdanynyń № 15,16,17 úıleriniń balalar oınaıtyn alańynyń sapasyzdyǵyna oblys ákimi A.Batalov qana emes, turǵyndardyń ózderi de narazylyq bildirdi.

Oblys ortalyǵyn aralaý barysynda abattandyrylǵan aýlany kórýge barǵan oblys ákimi balalar  alańy sapasyz salynǵanyn synǵa aldy. Alańnyń shetine aınaldyra túgeldeı qıyrshyq qum-tas tóselgen, qoıylǵan oryndyqtardyń, ýrna temirleriniń sapasyzdyǵy – osynynyń bári balalardyń alańsyz oıynyna, qaýipsizdigine laıyqtalmaǵan. Qum tóselgen alańqaı da qurylys normalaryna saı emes. Balalar syrǵanaıtyn, órmeleıtin atraksıonnyń ózi eski nusqada jasalǵan. Osyndaı olqylyqtary kózge uryp turǵan aýlanyń turǵyndary da balalar alańynyń jaısyz jasalǵandyǵyn aıtyp, shaǵymdaryn jetkizdi.

Óz kezeginde oblys basshysy aýlany túgeldeı qaıta jasaýdy tapsyrdy. Merdiger kompanıa jumysynyń sapasyn qadaǵalaý qala ákimdigine eskertildi.

Jalpy Taldyqorǵan qalasynda búginde 245 aýla bar. Ótken jyly 8 aýla abattandyrylyp, oǵan 187,4 mln. teńge bólinse, 2017 jyly 13 aýlaǵa 211 mln. teńge qarastyrylǵan.

Almaty oblysy ákimdiginiń baspasóz qyzmeti